Georg Ringsgwandl
Aus Wikipedia
 |
Der Artikl is im Dialekt „Reichahollarisch“ gschriem worn. | |
Georg Ringsgwandl (* 15. November 1948 in da Staffabruck bei Reichahoi) is a boarischa Kardiologe, Kabarettist und Liadamacha.
Inhaltsverzeichnis |
[dro wärkln] Biographie
Aufgwachsn is a in da Staffabruck, wo zu Reichahoi gheart. Sei Vatta war bei da Post. Musispuin hod a mit da Zitha ogfanga, de ra vo seina Tant gschenkt griagt hod.
Gitarrnspuin hod a se seibad beibrocht, weil a 1967 acht Monat mit Tbc (Lungaharing) im Sanatorium bleim hod miassn. Dodanoch hod a in Minga Medizin studiert und zum Dr. med. promoviert.
Noch da Zeit ois Assistenzarzt am Mingara Klinikum Großhadern is a a Zeidl noch Amerika ganga. Nachand war a Oberarzt in da Kardiologie in Garmisch-Partnkircha. Nemher is a mit seim Kabarettprogramm durch Deitschland tourt und hod an Haffa Auszeichnunga eigsacklt, unta andam an Deitschn Kleinkunstpreis.
Sei erschts eings Programm war "Gurkenkönigs Hausfrauenshow", mit dem a 1978 auf Tour ganga is. De Tourerei is dann mit weidane Programme so weida ganga, bis a 1993 sein Arztberuf komplett an Nogl ghengt hod und seitdem blos no ois Künstla tätig is.
De Besetzung vo seina Band hod se ollawei wieda g'ändat. Am längstn und intensivstn hod a am Ofang mit dem Gitarrnspuia Georg Schreiner ("Schreiner Schoarsch" gnennt) und dem Keyboarda Klaus Reichart zsamgarbat. Wichtig is aa da Nick Woodland, wo seit "Voglwuid" (offiziell: Vogelwild) ois Bluesgitarrnspuia dabei is.
Ned nur seine Liadln, sondan vor oim de Monologe zwischn de Songs bei de Livekonzerte san bei seine Fans gfrogt. Desweng san ab da CD "Der Gaudibursch vom Hindukusch" aa gsprochane Text zum hern.
Im Fernseng war a natirle aa ollawei wieda, z.B. in "Ottis Schlachthof", im "Scheibenwischer" und aa in da oa oda andan Talkshow.
Sei Musikstil setzt se aus Elemente vo da boarischn Voiksmusi und Rockmusi mit skurille und parodistische Elemente zsama.
Da Ringsgwandl lebt mit seina Frau, de Ärztin is, in da Neh vo Garmisch-Partnkircha.
Sei aktuells Programm 2006 hoaßt "Der schärfste Gang".
[dro wärkln] Diskographie, Bühnastickl
- 2006: Der schärfste Gang
- 2005: Alte Reißer – Verreckte Geschichten (live Conferencen)
- 2004: Prominentenball (Boarischs Staatsschauspui)
- 2001: Gache Wurzn
- 1998: Ludwig II - Die volle Wahrheit (Münchna Kammerspui)
- 1996: Der Gaudibursch vom Hindukusch
- 1995: Die Tankstelle der Verdammten (Münchna Kammerspui)
- 1993: Staffabruck
- 1992: Vogelwild
- 1991: I wui net Ski fahrn, aber i muaß (Single)
- 1989: Trulla! Trulla!
- 1986: Das Letzte
[dro wärkln] Auszeichnunga
- 1987 Salzburger Stier
- 1988 Deutscher Kleinkunstpreis
- 1998 Ernst-Hoferichter-Preis
- 2005 Prix Pantheon Sonderpreis Reif & Bekloppt
- 2006 Bayerischer Kabarettpreis in der Rubrik Musik
[dro wärkln] Links
| Personendaten | |
|---|---|
| NAME | Ringsgwandl, Georg |
| KURZBESCHREIBUNG | ein bayerischer Kardiologe, Kabarettist und Liedermacher |
| GEBURTSDATUM | 15. November 1948 |
| GEBURTSORT | Bad Reichenhall |
