Boĵidar Popoviĉ
El Vikipedio
Boĵidar POPOVIĈ (naskiĝis 1913 - mortis la 6-an de marto 1993 en Beogrado) estis iama vicprezidanto (1973-1974) kaj komitatano (1953-1977) de UEA.
Astronomo kaj matematikisto, li multflanke aktivis ekde 1935 en la Esperanto-movado en Serbio, en Bosnio-Hercegovino kaj denove en Serbio. Li fariĝis en 1958 la unua direktoro de la Esperanto-instituto en Sarajevo. Li direktoris Jugoslavian E-Instituton (1962-1965) kaj estis prezidanto de Jugoslavia E-Ligo (1969-1979). Lia lernolibro Esperanto u 12 lekcija (1954) aperis en 5 eldonoj, kaj ĝia ampleksigita varianto Esperanto u 40 lekcija estas daŭre uzata.
Popoviĉ plej elstare aktivis sur la scienca kampo. Inter 1952 kaj 1977 li estis la ĉefa animanto de Internacia Scienca Asocio Esperantista, kiun li estris kiel ĝenerala sekretario (1954-1971) kaj prezidanto (1971-1977). La plifortiĝon de ISAE en tiu epoko markis la regula aperado de Scienca Revuo kaj Bulteno de ISAE. En sia scienca kariero Popoviĉ konsekvence aplikis Esperanton: duonon de siaj studoj li aperigis, la alian duonon li resumis en Esperanto. Popoviĉ estis Honora Membro de UEA ekde 1977.
