Flavabdomena tragopano
El Vikipedio
Flavabdomena tragopano (Tragopan caboti) el la ordo de galinoformaj birdoj kaj familio de fazanedoj estas birdo propra al Ĉinio, kiu loĝas en meza kaj nordokcidenta Fuĝjan, norda Gŭangdong, nordorienta Gŭangŝji, suda Ĝeĝjang kaj nordorienta Hunan.
Ĝi estas iom pli granda ol koko. La maskla birdo havas plumtufon, kies antaŭa duono estas nigra kaj la posta duono ruĝa. La supra korpo sin montras kaŝtanruĝa, kun haŭtflavaj ovalaj makuloj, la malsupra korpo estas haŭtflava. La femala birdo havas okran supran korpon punktitan de nigraj kaj brunblankaj lancoformaj makuloj kaj helan haŭtflavan malsupran korpon. La brusto estas punktita de nigraj makuloj kaj la abdomeno kun evidentaj blankaj makulegoj.
La birdoj loĝas en montregionoj ĉirkaŭ 700 ĝis 1 600 metrojn super la marnivelo. Ili agas 7-12-ope, en valoj, kie tutjare fluas rivereto, prosperas arbustoj, bambuoj, pteridoj kaj aliaj lignecaj plantoj. Juna folio, burĝono kaj frukto estas iliaj ĉefaj manĝaĵoj. Ili manĝas ankaŭ iom da insektoj.
Ĉar la birdo ne estas homtima, movas malrapide, oni nomas ĝin stulta koko. Oni mezuris la cerbon de la flavabdomena tragopano kaj trovis, ke la proporcio de ĝiaj cerba kaj korpa pezoj estas malpli granda ol tiu de la blanka fazano (Lophura) aŭ ora fazano. Tio estas interesa problemo.
En aprilo kaj majo la birdoj konstruas neston sur arbo aŭ sur tero. Ĉiufoje la birdino demetas 7-12 ovojn, kiuj estas terkoloraj kaj punktitaj de brunaj makuletoj. La ovo kun pezo de 41-52 gramoj estas same granda kiel kokovo. La femala birdo plenumas kovadon, kiu daŭras 27-29 tagojn. En tiu tempo la femala birdo tute ne volontas forlasi sian neston, escepte se aperas danĝero al ĝi. La idoj kreskas malrapide kaj nur post du jaroj la femalaj kaj masklaj birdoj povas diferencigi inter si per malsamkoloraj plumoj kiel iliaj gepatroj.
La birdoj troveblas en tre malmultaj lokoj, sed multas iliaj naturaj malamikoj (rabobestoj el la familio de felisedoj, agloj kaj aliaj), kaj krome ili estas stultaj kaj malrapidmovaj, tial ili estas facile kapteblaj. Nun troviĝas nur tre malmulte da tiaj birdoj. Bredi la birdojn estas ne malfacile, sed generigi ilin ne facile. Bredate en kaĝo masklaj birdoj povas pariĝi al ruĝabdomenaj tragopaninoj kaj generas hibridajn idojn.
