Kantabraj simboloj
El Vikipedio
Simboloj de Kantabrio.
[redaktu] Flago
La oficialajn farbojn de la kantabra flago fiksis la teksto de la Statuto de Aŭtonomeco de Kantabrio mem: du horizontalaj strekoj blanka kaj ruĝa, same larĝaj. Nur mankis elekti la karakteraĵojn de la blazonŝildo, kiu estis akompanonta la flagon.
La flago inspiriĝas de la marista flago, kiu dum la 18-a jarcento simbolis la marhavenon de Santandero.
[redaktu] Blazonŝildo
La blazonŝildo de Kantabrio havas rektangulan formon kun ronda ekstremo, kio estas tikipe hispana. La ŝildo estas tranĉita el lazura (blua) kaj gorĝa (ruĝa). Ĝi estis oficiale elektita je la 22-a de decembro 1984.
En la lazura kampo videblas krenela ora turo kaj ŝipo, kiu estas rompinta per la pruo ĉenon, kiu devenas de la turo kaj finiĝas en la maldekstra flanko de la ŝildo. Malsupre estas akvaj ondoj, kaj lazuraj kaj arĝentaj. Ĉio estas suraĵo kun du detranĉitaj viraj kapoj kun aŭreoloj (glorkronoj).
En la suba kampo, gorĝa, videblas ronda kantabra steleo kun geometriaj ornamaĵoj. Supre estas la hispanreĝa krono, dekorita per perloj. La supra kampo estas historia memorigaĵo pri la konkero de Sevilo fare de kantabraj maristoj en 1248, kun la turo (reprezentanta la Turon de la Oro) kaj la ŝipo rompinta la ĉenojn, kiuj malpermesis navigi tra la rivero Gvadalkiviro. Tio estas simbolo de la daŭra mara ago de Kantabrio. Ankaŭ estas referenco al la unueco de ties teritorio, sub la patronado de la martiroj Sankta Emeterio kaj Sankta Celedonio.
[redaktu] Himno
La 6-an de marto 1987 oni elektis kiel oficialan himnon la kanton Himno al la Monto (Himno a la Montaña), komponita de Juan Guerrero Urresti en 1926. En la hispana oni delonge nomas Kantabrion La Montaña (La Monto), kaj same okazas en la originala versio de la kanto. Por la oficiala versio oni do anstataŭgis la vorton Montaña per Cantabria.
