Manifesto de Prago
El Vikipedio
- Por legi pri la plano faligi la komunisman reĝimon en Rusio dum la dua mondmilito, vidu Manifesto de Prago (Rusio).
La Manifesto de Prago estas deklaro prezentita en la Universala Kongreso de Esperanto 1996 en Prago. Ĝia ĉefa aŭtoro estis Mark Fettes.
Laŭ la manifesto mem, ĝi estas deklaro de "anoj de la tutmonda movado por la progresigo de Esperanto" kaj direktiĝas "al ĉiuj registaroj, internaciaj organizaĵoj, kaj homoj de bona volo".
La manifesto intencas prezenti la celojn de la Esperanto-movado, atentigante pri la avantaĝoj de Esperanto el la sekvaj sep vidpunktoj:
- Demokratio (vidu ankaŭ: Lingva demokratio)
- Transnacia edukado
- Pedagogia efikeco (vidu ankaŭ: Propedeŭtika valoro de Esperanto)
- Plurlingveco
- Lingvaj rajtoj
- Lingva diverseco
- Homa emancipiĝo
[redaktu] Akcepto de la Manifesto
Ofte estas dirite, ke la manifesto estas akceptita de la kongresanoj en Prago. Efektive akceptis ĝin en Prago la Komitato de UEA la 20-an de julio 1996. Oni petis ankaŭ ĉiujn kongresanojn subskribi ĝin individue; tamen tion faris dum la kongreso nur 550 el la 2.972 kongresanoj. La aserto, ke akceptis ĝin "la kongresanoj" aŭ "la Universala Kongreso", do estas erara aŭ almenaŭ konfuza, eĉ se oni povus supozi, ke plimulto de la kongresanoj konsentis pri ĝia enhavo.
La kongresa rezolucio akceptita en Prago de la Komitato de UEA atentigis pri la manifesto per la vortoj "(...) konstatinte la gravecon de la principoj esprimitaj en la Manifesto de Prago (...)".
Kritiko pri la Manifesto de Prago troviĝas en ĉapitro "Manifestoj sen mitoj" de la libro Esperanto sen mitoj de Ziko Marcus Sikosek.
[redaktu] Plua kolektado de subskriboj
Post la UK en Prago, UEA daŭrigis la kolektadon de subskriboj. La 15-an de majo 1998, UEA registris la 11.111-an subskribon. En 2005, la nombro superis 13.000.
