San Giuliano Mare
El Vikipedio
San Giuliano Mare, foje nomata San Giuliano a mare, estas kvartalo de Rimini (Italio). Ĝi situas norde de la urbocentro, de kiu ĝin disigas la haveno de Rimini.
San Giuliano (= Sankta Juliano) estas iama fiŝkaptista vilaĝo. Ĝi situas ĉe la Adriatiko kaj ĉe rivero Marecchia, kiu iam fluis sude de San giuliano, sed estis devojigita al la nord-okcidenta flanko. La eksa fluejo de Marecchia nun estas la haveno de Rimini. San Giuliano do estas ĉiuflanke ĉirkaŭata de akvo.
La nomon de la vilaĝo donis la kirko de Sankta Juliano (ĉe strato Viale Tiberio), en kiu oni konservas la korpon de la sanktulo. La kirko enhavas altaran bildon de Paolo Veronese, "la martiriĝo de S-ta Juliano", kaj poliptikon de Bittino da Faenza kun scenoj el la vivo de la sanktulo.
Ĉe la okcidenta fino de la haveno la historia "Ponto de Tiberio", el la romia tempo, ligas na San Giuliano kaj Rimini. La ponto estas por la moderna trafiko mallarĝa, tial nur unudirekta. Okcidente de la ponto troviĝas la parko de la 25-a de aprilo, en la loko, kie iam oni ŝanĝis la fluon de Marecchia.
San Giuliano estas dividata de la fervojo inter Rimini kaj Bologna/Ravenna, kiu tie iras paralele al la marbordo. La norda parto inter la fervojo kaj la plaĝo estas dominata de mal- kaj mezgrandaj hoteloj por someraj turistoj. La etoso estas pli familieca ol en la centro kaj sudo de Rimini; la pliparto de la turistoj estas italoj.
Post la transigo de la foirejo de Rimini el la centro al Rivabella, okcidente de San Giuliano, ankaŭ kelkaj vizitantoj de foiroj venas loĝi en San Giuliano.
[redaktu] Esperanto
Don Duilio Magnani preskaŭ kvardek jarojn deĵoris kiel paroĥestro en la kirko de S-taj Johano kaj Paŭlo, kiun li mem igis ornami per skriboj en la itala kaj Esperanto. Magnani ankaŭ organizis kunvenojn; la kulmino de lia esperantista laboro estis la okazigo de la 16-a Ekumena Esperanto-Kongreso en 2003.
De la subteno de Magnani profitis ankaŭ la studadsesioj de AIS San-Marino, kiuj okazis tie en 1995, 1996, 1997, 1998, 1999 kaj 2003). En septembro 2007 AIS tie okazigos na SUS 30.
