Parlamento de Galicia

Na Galipedia, a wikipedia en galego.

Imaxe do Salón de Plenos

Galicia, nacionalidade histórica, está constituída en Comunidade Autónoma para acceder ó seu autogoberno de conformidade coa Constitución española de 1978, que recoñece e garante o dereito á autonomía das nacionalidades e das rexións que integran a nación española.

O Estatuto de Galicia é a norma institucional básica da Comunidade galega que define as súas institucións, competencia e administración pública, así como a súa economía e facenda.

Os poderes públicos de Galicia exércense a través do Parlamento, da Xunta e do seu presidente.

[editar] Funcións

exerce-la potestade lexislativa da Comunidade Autónoma,
controla-la acción executiva da Xunta,
aproba-los seus orzamentos,
designar para cada lexislatura das Cortes Xerais os senadores representantes da Comunidade Autónoma galega,
elixir de entre os seus membros ó presidente da Xunta de Galicia,
esixirlles responsabilidade á Xunta de Galicia e ó seu presidente,
solicitar do Goberno do Estado a adopción de proxectos de lei
presentar ante a Mesa do Congreso dos Deputados proposicións de lei,
interpoñer recursos de inconstitucionalidade
presentarse perante o Tribunal Constitucional nos supostos e termos previstos nas leis.

O Parlamento representa ó pobo de Galicia e constitúe a primeira das institucións da Comunidade Autónoma da que derivan tódalas outras, e é inviolable.

[editar] Sede

A sede do Parlamento de Galicia, mediante lei, radica na cidade de Santiago de Compostela (Horreo, 63 - 15702 Santiago de Compostela).

O salón de sesións é o lugar habitual onde teñen lugar as sesións do Pleno do Parlamento de Galicia, e os deputados ou as deputadas ocupan os asentos dispostos en forma de hemiciclo ante a Mesa presidencial.

O presidente da Xunta de Galicia e o seu Goberno ocupan a primeira fila de escanos, e o resto de deputados e deputadas, agrupados en grupos parlamentarios, ocupan os restantes previamente asignados pola Mesa do Parlamento.

No Parlamento de Galicia hai dous períodos de sesións, a saber, un que comprende os meses de setembro a decembro e outro de febreiro a xuño. Durante estes períodos, o Parlamento pódese reunir en sesións ordinarias que, habitualmente, teñen lugar de martes a venres de cada semana.

Fóra destes períodos de sesións, pódense realizar sesións extraordinarias se se cumpriren determinados requisitos.

O presidente do Parlamento é quen fixa a orde do día dos plenos, de acordo coa Mesa e a Xunta de Portavoces e tendo en conta o calendario de actividades. A orde do día das comisións vén determinada pola respectiva Mesa, consonte o calendario establecido pola Mesa do Parlamento.