Amendo di Bricker
From Wikipedia
La Amendo di Bricker es la kolektiva nomo di serio di proponita chanji a Usala Konstituciono, quin konsideris la Senato Usana dum la jardeko 1950. Ta chanji limitizus la extenso e ratifiko di traktati e exekutiva konkordi quin Usa facus. Oli nomesis segun John W. Bricker de Ohio, Usala konservativa Republikano, qua proponis oli.
Izolismo, la opiniono ke Usa devas ne partoprenar en altralandala konflikti e mondala politiko, sempre esis elemento de Usala politiko ma ol esis speciale forta dum la yari pos la Unuesma Mond-Milito. Usala partopreno en la Duesma Mond-Milito silentigis izolisma opinioni ma oli revenis dum la yari posmilita kom respondo a nova internacionala rolo di Usa, speciale a nova Unionita Nacioni ed olua filiala internacionala organizi. Kelki timis la perdo di Usala suvereneso a ta organizi transnacionala, pro la rolo dil Sovieta Uniono en la propago di internacionala Komunismo e la Kolda Milito.
