Fantasio

Vu Wikipedia, der fräier Enzyklopedie.

De Fantasio ass eng Comicfigur an ass Redakter am Journal de Spirou.

De Fantasio kënnt vun der Serie Spirou et Fantasio, déi 1938 vum Rob-Vel fir de Start vum Journal de Spirou geschriwen an och gezeechent gouf. De Personnage vum Fantasio gëtt 1944 agefouert, well de Chefredakter Jean Doisy vum Jijé, deen d'Serie 1940 iwerholl hat, verlaangt huet, nieft de Spirou e méi fantasieräiche Personnage ze setzen, fir der Serie e wéineg méi e geckegen Toun ze ginn.

Am Ufank huet de Fantasio ganz staark un den amerikaneschen Held vun der Serie Blondie erënnert. De Fantasio huet sech ausgezeechent als eng Zort verréckten Erfinder a Gaffeur - u sech war heen vis-à-vis vum Spirou genee dat wat spéider de Gaston Lagaffe vis-à-vis vun him wäert sinn.

1946 iwerhëlt den André Franquin d'Serie Spirou et Fantasio. Heen gëtt de Geschichte méi Komplexitéit an heen féiert och eng ganz Rei Niewepersonnagen an. Esou och ufanks 1957 de Gaston Lagaffe, dee schonns Enn 1957 eng eege Serie kritt, als Bureausjong vum Fantasio an der Redaktioun vum Journal de Spirou. Wéi de Franquin d'Serie Spirou et Fantasio schlussendlech un de Jean-Claude Fournier ofgëtt, ersetzt de Prunelle de Fantasio als dem Gaston säi Chef, well de Franquin net wollt, datt sech zwee ënnerschiddlech Fantasio'en sollten entwéckelen.

D'Figur vum Fantasio gëtt also weidergezeechent vum Fournier, dunn vum Nic a Broca, schliisslech vum Tome an Janry, a kierzlech vum Munuera a Morvan.