Glenn Miller
Vu Wikipedia, der fräier Enzyklopedie.
Den Alton Glenn Miller, gebuer den 1. Mäerz 1904 zu Clarinda am Iowa, USA, a gestuerwen de 15. Dezember 1944 iwwer der Manche, war en US-amerikaneschen Jazz-Posaunist, Bandleader, Komponist an Arrangeur.
Inhaltsverzeechnis |
[Änneren] Säi Liewen
Seng Kandheet huet de Glenn Miller am Nebraska, Oklahoma a Colorado verbruecht. Am Highschoolorchester vu Fort Morgan huet hien Trombone gespillt, dat huet et him erlaabt, zwee Joer laang gratis ze studéieren. No engem kuerzen Openthalt op der Universitéit vu Colorado gouf hien 1926 Member vun der Ben Pollack Band, déi en awer no zwee Joer erëm verlooss huet. Vun 1929 bis 1937 war de Glenn Miller onofhängegen Trombonist beim Red Nichols, Benny Goodman, dem Ray Noble senger American Band an den Dorsey-Bridder. Mat senger éischter eegener Band huet de Miller 1937 e puer Plakenopname bei Brunswick Records an Decca Records gemaach. Mee am selwechte Joer ass d'Grupp ausenanergaang.
Am Fréijoer 1938 koum den Duerchbroch. De Miller huet eng nei Band gegrënnt a krut e Vertrag fir dräi Méint am Glen Island Casino op Long Island. Duerch vill Radiosendunge gouf säi perséinleche "Sound" bekannt, an deem d'Klarinett de Saxophon féiert. Seng Eeegekompositioun Moonlight Serenade gouf zu senger Erkennungsmelodie. 1939 goung et weider mat Little Brown Jug, sengem éischte Milliounen-Hit, In the Mood, 1940 Pennsylvania 6-5000 an Tuxedo Junction an 1941 mat Chattanooga-Choo-Choo a String of Pearls“.
1941 krut de Glenn Miller seng éischt Gëlle Plack fir säin Chattanooga Choo Choo. Am September 1942 huet de Miller säin Orchester verlooss, an en ass an d'Arméi gaang. Do huet en d' "Army Air Force Orchestra" dirigéiert, en Orchester, dat vill méi jazzméisseg war wéi dem Miller seng eege Big Band.
No der Befreiung vu Paräis sollt d' "Army Air Force Orchestra" am Dezember 1944 do am Olympia optrieden. De Fliger, deen de Miller sollt iwwer den Ärmelkanal bréngen, ass ënnerwee verluergaang. Säi Militärorchester gouf doropshi vu sengem Arrrangeur Jerry Gray geleet.
[Änneren] Literatur zum Thema
- George T. Simon: Glenn Miller and His Orchestra. Da Capo Press (1980). ISBN 0306801299
[Änneren] Filmer mam Glenn Miller
- Sun Valley Serenade (1941) Regie: H. Bruce Humberstone
- Orchestra Wives (1942) Regie: Archie Mayo
[Änneren] Film iwwer de Glenn Miller
- The Glenn Miller Story (1952) Regie: Anthony Mann, mam James Stewart an der Titelroll.
