Jean-Louis Gilson
Vu Wikipedia, der fräier Enzyklopedie.
De Jean-Louis Gilson, besser bekannt als Abraham Gilson, oder Brudder Abraham vun Orval (Frère Abraham), (8. Oktober 1741 zu Habay-la-Vieille - 16. Oktober 1809 zu Florenville) war e Moler.
Hien huet eng Zäit am Ermitage vu Bizeux verbruecht an ass, mat 30 Joer, an d'Abtei Orval agetrueden. Do si se séier op seng Talenter als Moler opmierksam ginn. Hien huet sech dierfen en Atelier ariichten a Mol- an Zeechecoursë ginn. Kuerz duerno goung hie fir aacht Méint op d'Düsseldorfer Konschtakademie wou en en éischte Präis fir séng Kompositioun Adam et Ève pleurant Abel krut.
1793, wéi d'franséisch Revolutiounstruppen Orval zerstéiert hunn, ass hien an d'Stad Lëtzebuerg geflücht. Zwee Joer dono goung en an d'Probstei vu Conques, mee wéi 1796 d'reliéis Uerden opgeléist goufen, huet en sech zu Florenville en Haus, genannt La Brouque kaaft, wou en nees en Atelier ageriicht huet. E bekannte Schüler vun him war de Jean-Antoine Ramboux vun Tréier, deen 1843 de Conservateur vum Wallraf-Richart-Musée zu Köln sollt ginn.
Den Abraham Gilson ass mat 68 Joer, am Januar 1809 zu Florenville gestuerwen. Do sinn haut nach Copië vun zwee vu senge Wierker ze gesinn: Ee "Schutzengel" an ee Maria mam Rousekranz (d'Originaler hänken zu Baaschtnech am Musée Piconrue).
Am Ganze sinn e puer honnert Wierker vun him bekannt. De Brudder Abraham huet seng Biller méchtens mat Abm signéiert.
Aus senger Zäit zu Lëtzebuerg sinn haut nach ë a. Fresken erhalen, déi en am viischten Zëmmer vum Haus Nr.11 an der Nordstrooss gemoolt huet. D'Haus hat deemools engem Herr Merjey gehéiert, dee virdrun den Affekot vun der Abtei Orval war (Haut ass do e Restaurant dran). De Gilson hat och de Réfectoire vun der Neimënster-Abtei, décoréiert; dëse gouf awer am 19. Joerhonnert vun engem Feier zerstéiert.
