Kierch Miesdref
Vu Wikipedia, der fräier Enzyklopedie.
| Parkierch vu Miesdref | |
| Uertschaft | Miesdref |
| Par | Miesdref |
| Numm | Hl. Johannes den Deefer |
| Konsekratiounsjoer | 1868 |
| Parverband | Miersch |
| Architekt(en) | F. Cordonnier |
| Reliéis Gebaier | |
Inhaltsverzeechnis |
[Änneren] Geschicht
Matten am Uelzechtdall läit d'Par Miesdref (549 Awunner), déi aus den Uertschafte Miesdref (335 Awunner), Pëtten (197 Awunner) an Essen (17 Awunner) besteet. Zënter dem 23. November 1843 sinn dës dräi Uertschaften an enger Par vereenegt, an dat an der Gemeng Miersch.
D'Par Miesdref gehéiert zum Dekanat Miersch, an zënter 1990 och zum Parverband Miersch.
Während Miesdref an der kierchegeschichtlecher Vergaangenheet kaum eng Roll gespillt huet, huet Pëtten schonns fréi eng Kapell gehat. Déi eelste Kierch dierft wuehl d'Hauskapell am Pëtter Schlass gewiescht sinn.
Mat kenger Zeil gëtt a kierchleche Visitatiounsberichter eng Kapell zu Miesdref ernimmt, mä et besteet keen Zweifel, datt esou eng zu Miesdref schonns virun der Grënnung vun der Par bestanen huet. Et schéngt, wéi wann dës Kapell schonns virun Ufank vun der Franséischer Revolutioun dem Verfall soll no gewiescht sinn. D'Kapell vu Miesdref war net an der Lag, déi Gleweg während dem Gottesdéngscht ënnerzebréngen. Am Joer 1834 goufen éischt Pläng opgestallt, fir eng nei Kierch zu Miesdref ze bauen. Ursprénglech sollt eng nei Kierch fir d'Uertschafte Biereng a Miesdref gebaut ginn. Duerfir sollt si d'Moosse vun 25 x 13 Meter kréien. Ee Sträit koum op, wou dës Kierch gebaut sollt ginn. Déi Bierenger wollte si op halfem Wee Biereng-Miesdref, déi Miesdrefer a Pëtter wollte si op der Plaz vun der aler Kapell zu Miesdref, op der Plaz, genannt "bei der Kapell". Hei sollt och ee Paschtouschhaus gebaut an ee Kierfecht opgeriicht ginn.
Am Joer 1834 gouf den Aareler Konkukter fir ëffentlech Bauten, F. Cordonnier vum deemoolege Mierscher Buergermeeschter Jean-Jacques Deloos beoptragt, Pläng a Präiskalkulatioune fir eng nei Kierch fir Biereng, Essen, Miesdref a Pëtten opzestellen. Mä et sollt bis 1837 daueren, bis d'Autorisatioun erdeelt sollt ginn. Am Haus vum Notär Suttor huet den 3. Mee 1837 den ëffentlechen Zouschlag staffonnt, fir de Bau vun der neier Kierch ze garantéieren. D'Bauaarbechte waren schwiereg. D'Ofrechung vun der Kierch am Joer 1841 waren och schwiereg. Net alléng war an dëser Zäit déi Miesdrefer Kierch gebaut ginn, och déi nei Par- an Dekanatskierch vu Miersch war zënter dem 6. August 1843 vergi ginn. D'Sektiounen Miesdref a Biereng, déi zur Par Miersch gehéiert hunn, sollten heifir 18.860 Frang bäisteieren, Pëtten 6.729 Frang. Dës Uertschafte géifen awer vun hire Verpflichtunge befreit ginn, falls Miesdref sollt zu enger eegestänneger Par erhuewe ginn. Den 2. November 1847 hunn d'Awunner vu Miesdref, Pëtten an Essen eng Demande gemaach, fir eng eegestänneg Par ze ginn. De Bëschof Laurent huet den 23. November 1843 Miesdref, Pëtten an Essen vun der Par Miersch getrennt, an de Scheierhaff vun der Par Cruchten. Déi nei Par Miesdref-Pëtten/Essen gouf gegrënnt. Déi nei Kierch gouf dem hellege Johannes dem Deefer geweiht an 1868 konsekréiert. Zum Niewepatréiner gouf den hellege Lukas auserwiehlt.
[Änneren] Series Pastorum
1. Johann Schank, Paschtouer vu Miesdref 1843 - 1847
2. Michel Hippert 1847 - 1856
3. Johann Welter 1856 - 1874
4. Nicolas Courth 1874 - 1877
5. Jean-Pierre Wolff 1877 - 1897
6. Henri Theves 1897 - 1910
7. Joseph Menningen 1910 - 1935
8. Jean-Pierre Suttor 1935 - 1956
9. Emile Margue vun Uewerkäerjeng 1957 - 30.07.1990+
Nom Doud vum Paschtouer Margue gouf d'Par Miesdref dem Parverband Miersch ugegliddert. Zoustänneg fir d'Verwaltung vun der Par a fir d'Séelsuerg an den Uertschaften ass d'Pastoralteam vum Parverband Miersch zoustänneg, ënnert der Leedung vum Deche Ferdy Fischer. Zoustänneg fir d'Par Miesdref ass de jeeweilegen Geeschtlechen, deen am Miesdrefer Paschtouschhaus wunnt.
10. Ferdy Fischer vu Käl, Parverwalter 1990 - 1991
11. Maurice Péporté vu Reckeng op der Mess, Kaploun am Parverband Miersch 1991 - 1994
12. Paul Metz vun Esch-Uelzecht, Paschtouer am Parverband Miersch 1994 - 2000
13. Joël Santer vu Wecker, Kaploun am Parverband Miersch 2000 - 2004
14. Pierre Habarurema aus der Diözes Cyangugu (Rwanda) /Parverwalter am Parverband Miersch 2004 -
