Spärwandler
Vu Wikipedia, der fräier Enzyklopedie.
E Spärwandler (engl.: Flyback-Converter) gëtt fir d'Iwwerdroe vun elektrescher Energie benotzt a gehéiert zu der Famill vun de Schaltnetzdeeler. De Spärwandler ass e Gläichspannungswandler (DC-DC-Converter). Seng Virdeeler leie, wéi bei alle Schaltnetzdeeler, bei der Produktioun vun enger konstanter Ausgangsspannung, déi een, wéi ee wëllt, erop- oder eroftransforméiere kann.
[Änneren] Funktiounsweis
Bei de Spärwandler gëtt d'Netzwiesselspannung als éischt gläichgeriicht a glatgemaach. D'Gläichspannung gëtt dono mat engem séieren elektronesche Schalttransistor a Stécker gehaen (bei enger Frequenz vun ca. f=20Hz bis 200kHz). Doduerch entsteet un der Spull vum Transformator eng Rechteckspannung mat engem bestëmmten Taaschtverhältnis. D'Gréisst vum Taaschtverhältnes bestëmmt d'Gréisst vun der Gläichspannung un der Sortie vum Schaltnetzdeel. D'Spärwandlerspannung gëtt dann iwwert de Wandlertransformator ëmgewandelt a dono iwwert de sekundäre Eeweegläichriichter mat Glättungskondensator un de Laaschtwidderstand weiderginn.
[Änneren] Leetphas vum Schalttransistor
Während der Leetphas vum Schalttransistor gëtt magnéitesch Energie am Transformator gespäichert. De Stroum an der Primärwécklung klëmmt linear erop, well d'Stroumstäerkt duerch eng Spull wéint der Géigeninduktioun net sprongaarteg klamm kann. Well d'Sekondärwécklung géigesënneg gewéckelt ass, huet d'Anod vun der Diod negativt Potential: d'Diod ass gespaart. Et kann deemno sekondärsäiteg kee Stroum fléissen. Gouf de Kondensator virdrun awer opgelueden, liwwert en dem Laaschtwidderstand während dëser Spärphas déi noutwenneg Energie.
[Änneren] Spärphas vum Schalttransistor
Während der Spärphase vum Schalttransistor gëtt an der Sekondärwécklung duerch den Ofbau vum Magnéitfeld eng Spannung an ëmgedréiter Richtung induzéiert. Doduerch kann d'Diod leeden. Déi am Transformator gespäichert magnéitesch Energie gëtt un de Kondensator an un de Laaschtwidderstand weiderginn.
De Stroum fléisst also während der Spärzäit vum Transistor an de Laaschtkrees. Well nëmmen Energie während der Spärphas an de Sekondärkrees weidergi gëtt, nennt een dëst Schaltnetzdeel Spärwandler.
Am Allgemenge gi Laaschtännerungen am Spärwandler duerch Frequenzännerungen an duerch Ännerunge vum Taaschtverhältnes ausgereegelt.
