Doesburg

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.

Liegking van Doesburg

Doesburg (Nedersaksisch: Doezebarg) ies 'n sjtad en gemeinte in de Nederlandse provincie Gelderland. De gemeinte haet 'n oppervlakte van 12,90 km² (woavan 1,26 km² water) en 11.581 inweunersj (1 juli 2006). Doesburg liek aan de monding van de Oude IJssel in de IJssel.

[bewirk] Functies

Doesburg liek in e landboewgebeed. 't Sjtedsje zelf haet get industrie (metaal, boewmateriale). Bekènd ies Doesburg vanwege de mosterd dae hie geproduceerd weurt. 't Toerisme ies ouch belangriek; in de umgeving zint watersjportmeugelikhede.

[bewirk] Historie

Sjtadhoes van Doesburg

Doesburg kreeg in 1237 sjtadsrechte. 't Waor 'n belangrieke handelssjtad; in 1447 sjloot de sjtad ziech aan bie de Hanze. Vanaaf 't ing van de 15e ièw naom de welvaart in Doesburg aaf, ónder andere door 't verzande van de IJssel. Es vesting bleef 't waal nog van belang. Tösje 1701 en 1730 kreeg 't sjtedsje nuuj vestingwerke, óntworpe door Menno van Coehoorn.

Bies 1923 waor Doesburg officieel 'n vestingsjtad, woadoor 't boete de vesting neet koes oetbreije. Nao de Twiède Waereldoorlog haet me 'n aantal nuujboewwieke rónd de ouw sjtad geboewd.

[bewirk] Sjtadsbeeld en bezeenswaerdighede

Doesburg haet zien mieddelièws sjtraoteplan en 18e-ièwse verdedigingswerke behouwte. In de sjtad bevinge ziech väöl historische geboewe en monumente; saer 1974 ies de binnesjtad es besjermp sjtadsgeziech aangeweze. 't Baksjteine sjtadhoes ies laat-gotisch en dateert oet de 15e ièw. Daotegeneuver liek de 16e-ièwse Waag. De in laat-gotische sjtiel geboewde Martinikèrk mèt 94 maeter hoage tore ies in de Twiède Waereldoorlog deils verwoes en denao weer hersjtèld.