Frits Peutz

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.

't Glaaspaleis in Heerle oet 1933

Frits Peutz (7 april 1896 – 24 oktober 1974) waor 'ne Nederlandse arsjitek. Geboewe van häöm sjtoont veural in Nederlands Limburg; zien bekèndste werk ies 't Glaaspaleis in Heerle.

Peutz woort gebore in Uithuizen (provincie Greuninge). Hae volgde de mieddelbaar sjoal op Rolduc in Kèrkrao. Denao góng hae veur ingenieur lière aan de Technische hoagesjoal in Delf. In 1920 kièrde hae truuk nao Limburg en vestigde ziech in Heerle es arsjitek, hoewaal hae zien sjtudie nog neet houw aafgerónd. In 1925 sjtudeerde hae esnog aaf in de boewkunde.

In 1933 kreeg hae de opdrach van Peter Schunck um e warehoes te óntwerpe woa hae zien sjtoffe zou kènne verkoupe. Peutz óntworp e geboew mèt dragende pilere in de vörm van paddesjteul, woadoor de gevel gein dragende functie houw en in glaas koes were oetgeveurd. Daovan kump ouch de bienaam van diet geboew, Glaaspaleis. In 1999 ies 't Glaaspaleis door de Union of International Architects op 'n lies van 1000 belangriekste geboewe van de 20e ièw gezat.

Peutz zien sjtiel ies gerelateerd aan 't Nuuj Boewe, meh hae goof hie 'n eige interpretatie aan. In zien óntwerpe veur kèrke waor hae traditioneler. Hae gebruukde daoveur dèks mergel, woadoor zien kèrke aansjlote bie de traditioneel Limburgse arsjitectuur. Nao 1950 óntworp hae ouch kèrke in moderner sjtiele.