Kindersjrik
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
'ne Kindersjrik is e fenomeen oet de volkscultuur. 't Is 'ne figuur woevaan 't bestoon aon kinder weurt vertèld veur te veurkoume tot die oongewunsde dinger doen. Es e keend beveurbild neet nao bed wèlt of zien ete neet opit, zal de kindersjrik laankskoume.
De in de Laog Len meis veurkoumende kindersjrik is de beumaan, in Noord-Limburg ouch wel beukèl geneump. Wie dee perceis oetzuut en wat 'r deit ligk neet vas, meh aofsjrikwekkend is 'r wel. Veur erger oongehuurzemheid kinne awwers nog mèt de weerwouf dreige. Wee bij 't water geit speule moot oetkieke veur de nekker of de haokemaan, 'ne geis dee diech 't water in trèk es 'r zin heet. In 't koreveld hoesde de korewouf, eigelik gewoen 'n hamster, woemèt gedreig woort. Nachdere, wie de vliermoes en de ojl, weure ouch gebruuk: dees diere zien van häör eige al hendeg aongswekkend. In de Sinterklaostied weurt ouch Zwarte Piet es kindersjrik gebruuk. Teslotte gief 't talloeze variante, dèks in de vreemste vörm, wie de naaksluiper of de tenesnijer.
De kindersjrik, die inmiddels bekaans is oetgestörve umtot 't kinder te sjouw zouw make, kump bijna ummer veurt oet volksgluif, wat weer trökgeit op de veur-christelike Germaanse religie. Nao 't inveure vaan 't christendom storf 't Germaans pantheon snel oet, meh blaove relikte vaan de religie nog hiel laank euverind es bijgluif, zeker op 't platteland. Dat góng soms zelf zoe wied tot de Kèrk 't officieel erkinde. Op 't platteland zal 't zeker tot wied nao de Middeliewe gedoord höbbe tot 't bijgluif verdween, en wie me dao in 't begin vaan de twintegste iew oonderzeuk nao deeg waor 't nog neet gans verdwene. Wel waore de meiste vörm vaan bijgluif verawwerd en neet mie geaccepteerd door 't groetste deil vaan de bevolking. Es relik gebruukde me de notie vaan die figure tegeneuver kinder. De grens tösse wat de awwers zelf gluifde en wat inkel gezag weurt veur de kinder sjouw te make is neet sjerp.
