Sint-Pieters-Woluwe

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.

Liegking van Sint-Pieters-Woluwe in 't Brussels Hoofsjtaejelik Gewes

Sint-Pieters-Woluwe (Frans: Woluwe-Saint-Pierre) ies 'n gemeinte in 't Brussels Hoofsjtaejelik Gewes. De gemeinte besjleit 'n oppervlak van 8,85 km² en haet 38.227 inweunersj (1 januari 2006). Sint-Pieters-Woluwe liek in 't oaste van de Brusselse agglomeratie, aan de Woluwe.

[bewirk] Functies

Gemeintehoes van Sint-Pieters-Woluwe

Sint-Pieters-Woluwe ies 'n residentieel gemeinte, mèt 'n euverwaegend Franstalige bevolking. D'r liegke zoa'n vieftig ambassades. De Tervurenlaan, 'ne oetvalsweeg veur Brussel riechting Tervuren, löp door de gemeinte. Saer 1988 haet de gemeinte 'n aansjleting op de Brusselse metro; de sjtasie Stokkel (geneump nao 'n veurmalig gehuch) ies 't eindpunt van lien 1B.

[bewirk] Aanziech en bezeenswaerdighede

Hoes Stoclet

De gemeinte ies te verdeile in twiè deile, 'n gebeed mèt villa's en hièrehoezer en 'n gebeed mèt kleiner rieweuninge, winkelsj en klein industrieë. Óngevaer 180 ha van 't gróndgebeed van de gemeinte besjteit oet greun zones; de belangriekste hievan ies 't Woluwepark. 'n Deil van 't Zoniënwoud liek ouch in Sint-Pieters-Woluwe.

De Sint-Pieterskèrk dateert oarsjprunkelik oet 1755, meh ies in de jaore 30 van de twintigste ièw herboewd, woabie de ouwe tore en 't koar bewaard bleve. De belangriekste bezeenswaerdigheid ies 't Hoes Stoclet (1905-1909), geboewd door de Weense arsjitek Joseph Hoffmann.

[bewirk] Historie

Sint-Pieters-Woluwe ies óntsjtange oet 'n aantal landboewgehuchte mèt groate boerderieje die bie de Abdij van 't Park (kortbie Leuve) huèrde. De ièrsjte vermelding, es Wolewe, dateert oet 1154. In 1409 vink me Wouwe Santi Petri.

Aan 't ing van de 18e ièw begoes me mèt turfóntginning in 't dal van de Woluwe; dees óntginning zou blieve besjtoon bies 1840. In 1800, ónder Frans bewind, kreeg de gemeinte die doe besjtóng oet 'n aantal gehuchte en buurtsjappe, de ièrsjte börgemeister en wèthouwer.

In 1897 woort de Tervurenlaan aangelag es verbingingsweeg tösje 't Jubelpark en 't kesjtièl van Tervuren. Ouch woort 'ne tremlien aangelag. Langs dees laan woorte al sjnel groate hièrehoezer opgetrokke. De gemeinte kreeg ummer miè 'n woonfunctie en de landboew naom in belangriekheid aaf. De versjtaejeliking kaom op gank vanaaf dezen tied, meh zat pas ech good door nao de Twiède Waereldoorlog, mèt de boew van nuuj wieke.

[bewirk] Externe link

Website van de gemeinte

Op de pazjena Category:Woluwe-Saint-Pierre van Wikimedia Commons zeen media gerelateerd aan dit óngerwerp te vènje

Brussels Hoofsjtaejelik Gewes
Anderlech \| Brussel-Sjtad \| Elsene \| Etterbeek \| Evere \| Ganshoren \| Jette \| Koekelberg \| Oudergem \| Schaarbeek \| Sint-Agatha-Berchem \| Sint-Gillis \| Sint-Jans-Molenbeek \| Sint-Joost-ten-Node \| Sint-Lambrechts-Woluwe \| Sint-Pieters-Woluwe \| Ukkel \| Vorst \| Watermaal-Bosvoorde