Zjwarte Piet
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Zwarte Piet is de helper vaan Sinterklaos, in 't Sinterklaosfies wie dat in de Laog Len geveerd weurt. Heer is 'ne neger mèt dikke luppe en 'ne zak op z'ne rögk woe de kedeukes veur de te bezeuke kinder inzitte. Heer dräög e laot-Middeliews kostuum, mèt 'ne baret, woe-op dèks 'ne veer zit.
Vaan oorsproonk waor Zwarte Piet 'ne geteemden duvel, dee Sinterklaos mós goon hölpe. Dèks hoolt Sinterklaos 'm aon 'ne lere band. Zoeget zuut me nog bij Sinterklaosveringe in Middel-Europa: ouch dao weurt Sinterklaos geaccompanjeerd door e duvelke. Dit kump waorsjijnlik door 't naïef racisme: de angs veur 'n oonbekind ras wat totaol anders oetzuut. In 't begin vaan de koloniaolen tied haolde kouplui oet 't zuie (veural Portugeze) ziech wel ins 'ne neger es helper.
Zwarte Piet deit euver 't algemein 't zwoer werk bij 't geve vaan kedeukes: heer liet ziech volges de aon kinder vertèlde verhaole door de sjouw zakke tot in de woenkamer boe de kindersjeun stoon; die völt 'r vervolges. Heer nump de wortel veur 't peerd vaan Sinterklaos mèt trök door de sjouw. Door al dit werk weurt 'r nog zwarter es wie 'r al is. Veural vreuger woort Zwarte Piet ouch gebruuk es kindersjrik: heer luusterde good wat de kinder dege, en wienie ze stout waore gewees naom 'r ze in de zak mèt nao Spaanje, woe de kinder daan e jaor móste blieve. Pedagoge höbbe aofgeraoje zoe'n verhaole nog aon kinder te vertèlle. Ouch waor Zwarte Piet e tiedsje 'nen domme figuur, dee alles fout deeg en zag. Dit raok noe ouch in oonbruuk, um 't latent racisme wat me dao-in trök meint te vinde. Teslotte is opvallend tot 't aontal Zwarte Piete vaan gewuunlik mer eine is touwgenómme nao tientalle of hoonderde: in kinderprogramma's mèt es thema Sinterklaos loupe väöl helpers roond, die allemaol hun eige werk höbbe.
