Ashoka
Us der alemannische Wikipedia, der freie Dialäkt-Enzyklopedy
Aschoka (Sanskrit, अशोक, Aśoka Priyadarosi; Pali: Asoka Piyadassi; Altgriechisch: Piodasses, Πιοδάσσης) isch e König us de altindische Dynastii vode Maurya gsii. Er het öppe vo 270–235 v. Chr. über de gröscht Tail vom hütige Indie regiert und gelt als aine vode wichtigste Herrscher vom alte Indie und und het entschaidend ade Verbraitig vom Buddhismus bitrait.
Nochdem er vo sim Vatter Binduasara d Herrschaft öbernoo het, het er mit allne Mittel sis Riich uusgwiitet. Doch nochde bluetige Unterwerfig vo Kalinga im hütige Orissa isch er ine Krise ghait, well er gsee het, ass de Chrieg sovill Elend und Schmerze brocht het. Druf abe het er sich em Buddhismus zugwendet und het uf witeri Chriegszüüg verzichtet und de Friede und soziali Wohlfahrt i sim Rich gfördertet. Er het nöd nu Champf und Chrieg verbote, sondern au bluetigi Tieropfer und isch dezue för vegetarischi Ernährig iitrete. D Tate und Denkwiis vom Aschoka sind i vilne Felsinschrifte überlieferet, won über halb Indie vertailt sind.
De Aschoka het mit de benochburte Herrscher fridlichi Bezüchige ufbaut und buddhistischi Missionare i ali Welt gschickt, so is Perserriich vode Seleukide und uf Ägypte und Makedonie. D Insle Sri Lanka isch unter sinere Herrschaft buddhistisch worde. Im Joor 253 v. Chr. oder 250 v. Chr. het er e buddhistisches Konzil iberuefe.
[ändere] Film
De Bollywoodfilm Asoka – Der Weg des Kriegers (2001; mit Shah Rukh Khan und Kareena Kapoor) isch as Lebe vom Aschoka agleent.
[ändere] Literatur
- Hermann Kulke und Dietmar Rothermund: Geschichte Indiens, Kohlhammer Verlag, Stuttgart 1982.
[ändere] Weblinks
| Persoonedaate | |
|---|---|
| NAME: | Ashoka |
| ALTERNATIVNAMEN: | Asóka, Asóka Maurya, |
| KURZBESCHREIBUNG: | 3. König der Maurya Dynastie, 'Kaiser' |
| GEBURTSDATUM: | 300 v. Chr. (?) |
| GEBURTSORT: | Nord-Indien |
| STERBEDATUM: | 231 v.Chr. (?) |
| STERBEORT: | Nord-Indien |
