Sri Aurobindo

Us der alemannische Wikipedia, der freie Dialäkt-Enzyklopedy

Dialäkt: Ùndertòggeborg

Schrii Aurobindo (Bangla: Sri Ôrobindo; Sanskrit: श्री अरविन्द Srī Aravinda; 15. August 1872 – 5. Dezember 1950) Indische Philosoph, Mystiker und Guru. Zält zu de gröschte Inder vom 20. Joorhundert, nebetem Mahatma Gandhi und em Rabindranath Tagore.

De Schri Aurobindo (Aurobido Akroyd Ghose) isch am 15. August 1872 z Kalkutta uf d Welt cho und mit sibni vo sim Vatter uf England gschickt worde. Döt het er zerscht z London, den z Cambridge studiert. Mi 21i isch er zrugg uf Indie und het as gaistige Füerer i de indische Fraihaitsbewegig mitgmacht. Wegeme Attentat, wo sin Brüeder dra betailigt gsii isch, isch er is Gfägnis cho, aber nocheme Johr fraigsproche worde. Er isch den 1910 uf Pondicherry ggange, woner zäme mit de Französin Mira Alfassa, de "Muetter", en Aschram gründet het. De Schri Aurobindo isch em 5. Dezember 1950 i sim Aschram gschtorbe.

Büecher woner gschribe het: S Göttlichi Lebe - Synthese vom Yoga - Essays über d Gita - Savitri etc. Im Johr 1950 isch er für de Literatur-Nobelpriis vorgschlage worde.

Er isch de Begründer vom Integrale Yoga. Da maint:

• S ganz Lebe isch göttlich, bis abe zu de nidrigschte Ebine.
• S aigni Lebe werd drum oni Vorbehalt oder Usnahm em Göttliche gwaiht.
• I alem wamer tuet, erchent mer sich selbst als individuelli Manifestation vom Göttliche, wo sich uf die Art zum Usdruck bringe will.

Da bedütet, as mer de Yoga (d.i. Verbindig mitem Göttliche) im Alltag, bi de Arbet, uf de Stross vollzücht und sich nöd inen Aschram zruggzücht oder irgedweli weltfremdi Sache macht.

De Schri Aurobindo schribt: "Me hend nöd d Absicht e Religion oder e philosophischi Schuel oder e Yoga-Schuel z gründe, villme wömmer e Haltig und e Methode entwickle, wone höcheri Woret jensits vom Mentale abebringe söll, aini wo no erraichbar isch für die menschlichi Seel und s menschliche Bewusstsii. … De Yoga-Weg wo mer gönd, underschaidet sich im Zweck vo anderne Wege. Denn sis Ziil isch nöd nume, sich usem Weltbewusstsii is göttlichi Bewusstsi ufelupfe, sondern villme die supramentali Macht vo sebem göttliche Bewusstsii abehole i d Unwüssehait vom Mental, Lebe und Körper, die transformiere, s Göttliche Wese offebare und e göttlichs Lebe ide Mateerie erzüge."

Schri Aurobindo: Vorbot vomene noie Zytalter

[ändere] Literatur

• Sri Aurobindo: Die Dichtung der Zukunft. (edition-sawitri.de) ISBN 3-931172-03-1
• Sri Aurobindo: Tagebuch einer Gefangenschaft. (edition-sawitri.de) ISBN 3-931172-12-0
• Sri Aurobindo: Über sich selbst. (Verlag Hinder und Deelmann)
• Kireet Joschi, Sri Aurobindo und Mutter, Auroville 2005

Persoonedaate
NAME:	Aurobindo, Śrī
ALTERNATIVNAMEN:	अरविन्द घोष
KURZBESCHREIBUNG:	indischer Philosoph und Guru
GEBURTSDATUM:	15. August 1872
GEBURTSORT:	Kolkata
STERBEDATUM:	5. Dezember 1950
STERBEORT:	Pondicherry