Cjase

De Vichipedie, la enciclopedie libare dute in marilenghe.

Par cjase si intint une struture naturâl o une costruzion artificiâl doprade dal om par vivi e no cjapâ il vint, la ploie, il frêt e il cjalt. Une cjase e po tegni une o plui fameis e cualchi volte ancje animai, e po vê une jentrade par une o plui puartis e vê balcons, scjalis, implants e servizis.

[cambie] Storie

Fin cuant che l'om al à scomençât a vivi su cheste Tiere e a fâsi une famee, al à simpri vût bisugne di une cjase dulà vivi, mangjâ, scjaldâsi e durmî.

Za lis primis popolazions de Mesopotamie e dal antîc Egjit si fasevin la cjase cui modons cuets tal fôr e le pae, o cun altris materiâls che cjatavin. Si podevin cjatâ za sedi abitazions par une sole famee sedi abitazions par plui fameis, cun tant di curtîl, e lûcs riservâts par lis feminis e la servitût.

La cjase inte antighe Grecie e scomence a cjapâ une identitât e une forme: fatis cul len, l'arzile e la pae, lis cjasis de antighe Grecie a jerin une vore diferentis: scuris e cence comoditâts pai puars, plui fuartis e fatis cu la piere par chei che podevin paiâ. La cjase greche e veve une plante retangolâr, un curtîl centrâl e plui stanzis.

La cjase de Rome antighe e jere plui o mancul come chê greche, e veve un o doi curtîi (clamâts atrium e peristilium) e veve une bande dulà l'om al podeve stâ cu la sô famee, e une altre bande par la vite publiche. Bisugne ancje dî che te antighe Rome, no ducj a vevin il stes tip di cjase: la int dal popul e leve a stâ intes insulae, cjasis popolârs che vevin pui plans e dentri no si podeve fâ di mangjâ e no si podeve piâ il fûc parcè jerin fatis di len e modon, e al jere facil che cjapassin fûc.

I senatôrs e la int dal podê e leve a stâ fûr de citât, tes villae, costruzions in piere in plene campagne, dulà che i siôrs no si fasevin mancjâ nuie.

Tal periodi de Etât di mieç la cjase torne a jessi une abitazion unifamiliâr, ma il vivi dal om si svilupe dentri dai monasteris e cjiscjei, dulà che il vivi e il lavorâ dal om si jere aromai spostât.

Intal Rinassiment si torne a un ideâl di cjase scuasit come chel de epoche romane, ma in cheste ete lis costruzions plui impuartantis a son di utilitât publiche: glesiis, palaçs dal Comun e puints a restin lis preocupazions principâls par chei che al timp a jerin clamâts a ocupâsi di architeture.