Eallju
Ut Wikipedy
Mei Eallju of de adel waard froeger de elite fan in lân oantsjutten. De stân fan eallju ûntstie likernôch oan it begjin fan de jiertelling en waard stadichoan wichtiger. Yn de midsieuwen hienen sy in soad oansjen, mar yn de rin fan de tiid is dat hieltyd minder wurden.
[bewurkje seksje] Fryske Eallju
Doe't de Franken yn de 8e ieu in ein makken oan it Fryske ryk en it gebiet fan de Fiezen ynlive waard by it Frankyske ryk troffen sy hjir gjin maatskippij oan fan allinich likensen. Oeral wienen doe al eallju en grutgrûnbesit oanwêzich. En it soenen benammen de eallju weze, dy't as earsten ree wienen om gear te wurkjen mei it Frankyske ryk en oerstapten nei it kristlik leauwen. Al ûnder Pipyn II hawwe de Franken besocht om de Fryske eallju oan harren te binen troch skinkingen en troch ferdûbeling fan harren warjild.
It Frankyske stribjen wie der benammen op rjochte om yn de Fryske gebieten in betroude hearskjende groep te krijen dy't it nije bewâld stypje soe. Sy mijden dêrby net om de Friezen grutte stikken lân te ûntfytmanjen en oer te dragen oan Frankyske trouwelingen. In soad lân kaam sa yn besit fan Frankyske eallju. Nei ferrin fan tiid soe út dizze beide groepen in nije ealstân ûntstean.
