Kristendom
Ut Wikipedy
It Kristendom is in religy basearre op it libben fan Jezus Kristus lykas it beskreaun is yn it Nije Testamint. Sintraal stean syn preekjen, krúsdea en Ferrizenis. It Kristendom is in monoteïstyske godstsjinst; dat wol sizze: kristenen belide it leauwen yn ien God. De kristenen leauwe dat Jezus de soan fan God is en de Messias dy't foarsein is yn it Alde Testamint. It Kristendom is in wrâldgodstsjinst en is de grutste religy op 'e wrâld mei likernôch 1,5 miljard oanhingers. Alhoewol't de religy út Palestina komt, is de religy benammen yn Jeropa en Amearika grut wurden.
Yn 'e rin fan 'e tiid is der yn it kristendom in westerske en easterske tradysje kaam. Ta de westerske tradysje kin it Katolisisme rekkene wurde en it dêrút ûntsteane Protestantisme. Ta de easterske tradysje kinne de Oriintaalsk-Ortodokse Tsjerke rekkene wurde, dy't ôfstân nimme wolle fan it Konsily fan Sjalsedon (451), en oan de oarekant de East-Ortodokse Tsjerke, dy't ûntstien binne nei it skisma fan 1054 en dy't teologysk mar krekt ôfwike fan it katolisisme. Al dizze tradysjes ûnderskriuwe de kanones fan it Konsily fan Nikea.
[bewurkje seksje] Streamings
Trochdat it Kristendom op in protte wizen beliden wurdt, is it Kristendom yn fjouwer haadgroepen op te partsjen:
- Katolike Tsjerke
- East-Ortodokse Tsjerke
- Oriïntaalsk-Ortodokse Tsjerke
- Protestantske Tsjerke
Oare groepen binne hjiroan besibbe mar hawwe sterker ôfwikende learstellings, wêrtroch hja troch de haadgroepen almeast net ta it Kristendom rekkene wurde:
- De Kristenmienskip
- Hernhutters
- Quakers
- Darbysten
- Keltysk kristendom
- Children of God
- Jehovah-tsjûgen
- Jezus-moslims
- Mormoanen
- People's Temple
- Stevenisten
- Ferienigingstsjerke
- Frij-katolike Tsjerke
