George Orwell

Ut Wikipedy

George Orwell (* 25 juny 1903, Motihari - † 21 jannewaris 1950, Londen), wiere namme Eric Arthur Blair, wie in Britsk skriuwer.

Orwell waard 25 juny 1903 berne yn Motihari, yn Bengalen, Yndia, as soan fan de Skotske Richard en Ida Blair. Doe't er ien jier âld wie naam syn mem him mei nei Ingelân dêr't er in typysk Ingelske opfieding krige. Hy tsjinne fan 1922 ôf fiif jier by de plysje in Birma, oant er it ymperialisme net mear oansjen koe. Yn 1933 keas er it pseudonym George Orwell, in ferwizing nei it Ingelske lânskip: "George" is Sint Joris, de beskermhillige fan Ingelân; "Orwell" is de rivier de Orwell yn Suffolk, dy't er ien fan de moaiste plakken fan Ingelân fûn. Yn de Spaanske boargeroarloch focht Orwell mei yn de Ynternasjonale Brigade, dêr't er slim ferwûne by rekke.

Yn 1936 troude er mei Eileen O'Shaughnessy. Tegearre adoptearren se in soan, Richard Horatio Blair. Yn dy tiid krige Orwell ek mear sukses as skriuwer, en yn 1944 skreau er syn bêste wurk, Animal Farm (Bistepleats), dat yn 1945 útkaam. It boek is in satire, skreaun as in oanklacht tsjin it Stalinisme. Yn datselde jier ferstoar syn frou by in operaasje.

Yn 1948 skreau er it boek dêr't er it meast ferneamd foar is, Nineteen eighty-four (Njoggentsjin-fjouwerentachtich). It beskriuwt in takomstige, totalitêre wrâld, dêr't de minske folslein troch de steat oerhearske wurdt. It jiertal "1984" woe net sizze dat Orwell foar dat jier sa'n takomst foarseach; it wie gewoan "1948" mei twa sifers oarsom. It boek kaam út yn 1949 en yn de hjerst fan dat jier troude er op 'e nij, mei Sonia Brownell. Op 21 jannewaris 1950 ferstoar George Orwell oan tuberkuloaze.

[bewurkje seksje] Orwell syn wurk

• Down and Out in Paris and London (1933) — [1]
• Burmese Days (1934) — [2]
• A Clergyman's Daughter (1935) — [3]
• Keep the Aspidistra Flying (1936) — [4]
• The Road to Wigan Pier (1937) — [5]
• Homage to Catalonia (1938) — [6]
• Coming Up for Air (1939) — [7]
• Animal Farm (1945) — [8]
• Nineteen Eighty-Four (1949) — [9]