Jetske Bilker
Ut Wikipedy
Jetske Bilker (* 16 april 1960, Seisbierrum) is in Fryske skriuwster.
Jetske Bilker is 16 april 1960 berne yn Seisbierrum. Fan har sechsde jier ôf is se opgroeid yn Dimter en se folge dêr ek de HAVO. Yn 1977 folge se yn Almelo de Kristlike Pedagogyske Akademy. Yn jannewaris 1982 ferhuze se nei Ljouwert en helle it twaddegraadsfoech Frysk oan de Noardlike Leargongen. Yn 1986 begûn se mei de stúdzje Algemiene Literatuerwittenskip yn Grins dêr't se yn 1990 ek hinne gong te wenjen.
Yn 1986 krige Bilker in opdracht om in Fryske roman te skriuwen. Dat waard Imitaasjelear dat yn 1988 by de Koperative Utjouwerij útkommen is. Yn 1990 krige se der de Fedde Schurerpriis foar. Yn 1989 kaam se yn de redaksje fan it tydskrift 'Trotwaer' en waard letter einredakteur oant 1995.
Yntusken wenne se yn Grins en studearre ôf yn 1992. Dernei folgen tydlike banen, lykas by it Frysk ynstitút fan de RUG, by it NLMD yn De Haach. Nei tsien jier les jûn te hawwen yn de fakken Frysk en Nederlânsk oan de CSG Comenius yn Ljouwert, keas se yn 2006 folslein foar de literatuer.
Yn 1997 kaam by Utjouwerij Bornmeer de ferhalebundel [[In nacht fan hûs]] út, mei ferhalen oer eigentiidske tema's as relaasjeproblematyk.
Yn 2004 fersoarge Bilker it boekewikegeskink dat de titel Oar plak oare tiid meikrige. Yn datselde jier folge de Nederlânske oersetting by útjouwerij Prometeus yn Amsterdam: Andere plaats, andere tijd Fan febrewaris 2003 oant july 2005 siet se yn 'e redaksje fan it Frysk ynternettiidskrift Farsk, tegearre mei Marc Kooij, Elske Schotanus en einredakteur Abe de Vries. Se fersoarge it proaza en skreau kritiken.
Yn septimber 2006 waard se fêste kritikus foar de Ljouwerter Krante foar it Frysk proaza.
Yn juny 2007 ferskynde it earste part fan de Harry Potter rige yn it Frysk yn in oersetting fan har hân.
Bibliografy
- 1988 - Imitaasjelear
- 1997 - In nacht fan hûs
- 2004 - Oar plak oare tiid
Oersettings nei it Nederlânsk
- 2004 - Andere plaats andere tijd (Oar plak oare tiid)
Oersettings nei it Frysk
- 2007 - Harry Potter en de stien fan 'e wizen (Harry Potter and the Philosopher's Stone)
