Windows Vista

Z Wikipedije, swobodneje encyklopedije

Dotalne wobrazy Microsoft Windows Vista podleža wšitke copyrightu.

Windows Vista je nowy operaciski system softwareoweje firmy Microsoft, kotryž přistupni so šěršej zjawnosći spočatk lěta 2007. Za běžneho wužiwarja je zajimawe, kak je grafiski system sčinjeny, dokelž je so cyły design porno Windows XP dale wuwił. Hdyž so na př. z pomocu tastow WINDOWS + TAB mjez aplikacijemi přepina, njejsu wjace jenož ikony widźeć, kaž běše to we Windows XP, ale wobrazy woknow aplikacijow.

We Windows Vista so tež wšitke dokumenty lěpje a spěšnišo namakaja, dokelž so indeksowanje wšitkich dokumentow w pozadku přewjedźe. Dokumenty hodźa so potom prosće tak namakać, zo kliknje so na tłóčatko START a zapoda so pytane hesło.

Cyły nowy system zestaja so z komponentow, to rěka, zo je móžno jenož to instalować, štož wužiwar woprawdźe chce. Tuta kajkosć je woprawdźity postup porno Windows XP. Njeje na př. hižo trjeba, Internet Explorer hromadźe ze systemom instalować, ale je móžno, na př. wote wšeho spočatka Mozillu a druhe browsery za internet wužiwać.

Windows Vista hodźi so tež z hłosom posłužować. Tuta funkcija pak wobsteji tuchwilu jeničce za jendźelšćinu, ze serbšćinu a tež druhimi, wjetšimi rěčami to hišće móžno njeje. Nadrobniše informacije k tutej temje – wosebje k wobšěrnym nowostkam Windows Vista porno Windows XP – namakaja so pod adresu http://www.microsoft.com/windowsvista.

Na zakładźe Microsoft Local Language Program je so tež serbšćina do Microsoft Windows Vista jako rěč přiwzała. Praktisce rěka to, zo može so serbšćina jako zakładna rěč wuzwolić a zo da so serbski tastaturowy layout wužiwać. Je to přihot za dalše projekty nastupajo prawopisnu/gramatisku podpěru pod Microsoft Office etc.