Hjalmar Eklund

De Wikipedio

Hjalmar Magnus Eklund esis Finlandana pioniro-Idisto. Ilu naskis ye 12 di januaro 1880 en Turku e mortis ye 10 di junio 1937 en Parainen proxim Turku.

Hjalmar Eklund esis tre talentoza e laborema en multa domeni. Il studiis matematiko, fiziko e filozofio en l' universitato di Helsinki divenante laureato ye 1903. Il koncentris su en quanto-doktrino(?), qua esas inter matematiko e logiko. Tale il divenis unesma logikisto (tatempe nova domeno) en Finlando.

Ye 1906 il laboris en fonetikala laboratorio che la historiala-linguistika seciono. Forsan ibe il intereseskis pri lingui e, kom matematikisto-logikisto, pri artificala lingui.

De 1906 til 1918 Eklund laboris kom docisto en diversa gimnazii en Turku e Pori. Samatempe il prolongis lua studio: ye 1911 il divenis laureato pri filozofio. Il studiis anke en Germania: ye 1909 e 1910 en Göttingen (matematiko), ye 1913 en Leipzig (filozofio) e ye 1914 nove en Göttingen (filozofio). Lua maxim valoroza verki tatempa esis 1916 “Russells antimoni och andra paradoxala motsägelser. Logiska undersökningar” ed 1918 en Norvegiana revuo Nyt Tidskrift for Matematik “Über Mengen, die Elemente ihrer selbst sind”.

En domeno di filozofio, l’ etikala pensado di Immanuel Kant esis lua precipua objekto. Anke la filozofio di Rudolf Carnap, Moritz Schlick e Ludwig Wittgenstein de Wien-cirklo esis familiara ad Eklund.

Hjalmar Eklund esis anke ateisto e skribis kontre religii kritikante ma objektale. Pluse il esis socialisto e laboris kom jurnalisto. Il helpis Arbetet (“La Laboro”) jurnalo en Turku. Ye 1918 en Finlando komencis interna milito inter le Blanka (dextri) e le Reda (sinistri). La socialisti desvinkis la milito, ed Eklund esis enkarcerigita pro la partopreno en la revolto, ma il libereskis ye novembro 1918.

Ye 1919 Eklund divenis jurnalisto di Demokraatti (“La Demokrato”) en Turku. Il skribis multa artikli pri Ido en ca jurnalo. Tatempe il publikigis lua chefa verko Idala en Finlandana linguo: Ido-kielen kielioppi (“La Gramatiko dil Ido-linguo”).

Pose ye 1919 il esis nominita kom l’ unesma sekretario en jus-fondita “La Lernado-Uniono dil Laboristi” (Työväen sivistysliitto). Ye 1926 il retrovenis de Helsinki a Turku e laboris ibe kom asekuro-matematikisto che la firmo “Sampo” til 1933. Il mortis ye 1937 evante nur 57 yari.
---

Atencez! Samatempe kam Hjalmar Magnus Eklund vivis, funcionis en social-demokrata movado anke Hjalmar Erik Eklund, qua esis diferanta persono.