Írak

Úr Wikipediu, frjálsa alfræðiritinu

Lýðveldið Írak er land í miðausturlöndum sem nær yfir það svæði þar sem áður var Mesópótamía á milli ánna Efrat og Tígris og suðurhluta Kúrdistans. Það á landamæri að Kúveit og Sádí-Arabíu í suðri, Jórdaníu í vestri, Sýrland í norðvestri, Tyrkland í norðri og Íran í austri. Írak á mjóa strandlengju í Umm Quasr við Persaflóa.

Fyrir fyrri heimsstyrjöldina tilheyrði Írak ottómanska veldinu, eftir hana liðaðist það í sundur. Á millistríðsárunum var Írak í umsjá Bretlands í umboði Þjóðarbandalagsins. Það hlaut sjálfstæði 3. október 1932. Á árunum 1980-88 geisaði stríð á milli Íraks og Írans. Persaflóastríðið var háð 1991 eftir að Írak hafði ráðist á Kúveit. Ný tímabundin ríkisstjórn var kjörin í janúar 2005, í kjölfar innrásarinnar í mars 2003, sem leidd var af Bandaríkjamönnum og Bretum og kom Ba'ath flokknum og leiðtoga hans Saddam Hussein frá völdum.