Eimskipafélag Íslands
Úr Wikipediu, frjálsa alfræðiritinu
 |
|
| Gerð: | Almenningshlutafélag (OMX: The Nordic Exchange: HFEIM) |
|---|---|
| Stofnað: | 17. janúar 1914 |
| Staðsetning: | Reykjavík, Ísland |
| Lykilmenn: | Magnús Þorsteinsson, stjórnarformaður Eggert Magnússon, stjórnarmaður Sindri Sindrason, stjórnarmaður Þór Kristjánsson, stjórnarmaður Gunnar M. Bjorg, stjórnarmaður |
| Starfsemi: | Flutningaþjónusta |
| Fjöldi starfsmanna: | 10.000, þar af um 9.000 erlendis |
| Vefslóð: | www.eimskip.is |
Eimskipafélag Íslands er íslenskt skipafélag sem rekur flota flutningaskipa. Félagið var stofnað 17. janúar árið 1914 og keyptu mjög margir Íslendingar stofnhluta í félaginu í upphafi, svo það var kallað „óskabarn þjóðarinnar“. Félagið hóf reglulegar siglingar árið 1915 með skipinu Gullfossi.
Undirbúningur að stofnun félagsins hófst árið 1912 og mynduð var bráðabirgðastjórn undir forystu Thors Jensens sem hóf undirbúning að hlutabréfasöfnun og kaupum á skipi. Um 15% landsmanna, um 14.000 manns, gerðust stofnfélagar í félaginu auk Vestur-Íslendinga og landsjóðs. Fyrsti formaður stjórnar var Sveinn Björnsson, síðar forseti Íslands. Tvö ný skip voru keypt fyrir félagið; Gullfoss og Goðafoss, bæði smíðuð í Kaupmannahöfn. Gullfoss kom til landsins 16. apríl 1915.
Hlutur Vestur-Íslendinga var árið 1964 lagður í sérstakan sjóð, Háskólasjóð, og því komið þannig fyrir að arður af hlutabréfunum rynni til Háskóla Íslands en stjórn Eimskipafélagsins færi með þau atkvæði sem hlutabréfin fólu í sér. Með þessum hætti, og með þeirri reglu að einungis skyldi kosið um helming stjórnar á hverjum aðalfundi, tókst hópi hluthafa sem áttu minnihluta í Eimskipafélaginu að halda í stjórn þess um áratuga skeið. Um leið var félagið mjög umsvifamikið á íslenskum fyrirtækjamarkaði og tengdist öðrum stórum fyrirtækjum eignaböndum. Eimskipafélagið varð þannig ein af stoðum kolkrabbans svokallaða. Í júlí 2007 tilkynnti Eimskip að það hefði tekið lán að andvirði 20 milljarða íslenskra króna til 5 ára hjá hollenska bankanum ABN Amro. Þetta er stærsta lán Eimskipa í sögu félagsins til og verður fjármagnið m.a. nýtt með því að lána til banka og fjármálastofnana.[1]
[breyta] Tilvísanir
- ↑ Eimskip semur um 25 milljarða króna lánaheimild. Morgunblaðið (5. júlí 2007).
[breyta] Tenglar
Þessi grein er stubbur sem ekki hefur verið settur í undirflokk. Þú getur hjálpað til með því að bæta við greinina, eða með því að flokka hana betur.
