Led Zeppelin

Úr Wikipediu, frjálsa alfræðiritinu

Led Zeppelin á tónleikum í Montraeux í Frakklandi í mars 1970.

Led Zeppelin var bresk rokk-hljómsveit, sem kom fram á sjónarsviðið árið 1968. Hún var ein af fyrstu vinsælu þungarokks hljómsveitunum ásamt hljómsveitum á borð við Deep Purple og Black Sabbath. Hljómsveitin hætti árið 1980 eftir andlát John Bonham.

[breyta] Saga

Hljómsveitina stofnaði Jimmy Page, sem setti saman hljómsveit eftir að hljómsveitin hans The Yardbirds leystist upp og spiluðu þeir félagar undir því nafni í nokkra mánuði. Í The Yardbirds voru nokkrir af frægustu gítarleikurum heims, Jeff Beck, Eric Clapton auk Jimmy Page.

Fyrsta plata hljómsveitarinnar kom út árið eftir og hét einfaldlega Led Zeppelin. Hún seldist ágætlega, náði 6. sæti á Bretlandi og 10. sæti í Bandaríkjunum. Seinna sama ár kom út önnur plata þeirra Led Zeppelin II og náði hún góðri sölu, varð í fyrsta sæti báðum megin Atlantshafsins. Á þeirri plötu er að finna eitt frægasta lag þeirra, Whole Lotta Love. Lög af þessum plötum fluttu þeir þegar þeir komu til Íslands 1970. Led Zeppelin III naut líka vinsælda eins og Led Zeppelin II. Árið eftir kom svo út plata sem bar í raun ekki nafn en er oftast kölluð Led Zeppelin IV og er það af mörgum talin þeirra besta plata með lögum á borð við „Rock and Roll“, „When the Levee Breaks“ og „Stairway to Heaven“. Tveimur árum seinna kom svo út Houses of the Holy sem naut álíka vinsælda og fyrri plötur. Tveimur árum seinna kom Physical Graffiti sem inniheldur hið fræga lag „Kashmir“. Þar á eftir gáfu þeir út plöturnar Presence árið 1976 og In Through The Out Door árið 1979 sem voru þeirra síðustu plötur. Hljómsveitin hefur selt yfir 300 milljónir platna um allan heim og segir það sitthvað um vinsældir hennar.

Hljómsveitarmeðlimir sveitarinnar voru Jimmy Page, sem spilaði á gítar, trommarinn John Bonham, Robert Plant sem söng og spilaði á munnhörpu og John Paul Jones sem sló á strengi bassans og spilaði á hljómborð.

Hljómsveitin hætti árið 1980 eftir andlát John Bonham. Tveimur árum seinna kom síðasta plata sveitarinnar út, Coda, en hún var afrakstur upptaka í hljóðveri áður en Bonham lést.

Led Zeppelin, sem er án efa ein af frægustu hljómsveitum sögunnar, hefur ákveðið að halda endurkomutónleika á O2 leikvanginum í London næstkomandi 26. nóvember.