Osama bin Laden
Úr Wikipediu, frjálsa alfræðiritinu
Usāmah bin Muḥammad bin ‘Awaḍ bin Lādin (fæddur 10. mars 1957) (arabíska: أسامة بن محمد بن عوض بن لادن), betur þekktur sem Osama bin Laden eða Usama bin Laden, (arabíska: أسامة بن لادن) er stofnandi Al-Kaída, hryðjuverkasamtaka súnní-íslamista. Samtökin hafa komið nálægt fjölmörgum árásum á borgaraleg jafnt sem hernaðarleg skotmörk úti um allan heim, þar á meðal eru árásirnar á Bandaríkin þann 11. september 2001 sem að urðu að minnsta kosti 2.752 manns að bana.
Osama telur sig og samtök sín berjast fyrir hagsmunum múslima; ein krafa hans var sú að bandarískur her færi frá Sádi-Arabíu en í því landi er að finna tvo helgustu staði í íslam. Bandaríkin drógu heri sína frá Sádi-Arabíu 2003 en ekki er ljóst hvort að ákvörðun um það hafði þegar verið tekin fyrir 11. september 2001.
Osama er eftirlýstasti maður vesturlanda og heita bandarísk stjórnvöld 50 milljónum bandaríkjadala í verðlaun handa hverjum þeim sem veitir upplýsingar sem leiða til handtöku hans. Dvalarstaður hans er óþekktur en algengast er að gengið sé út frá því að hann sé í felum í hinu róstursama pakistanska héraði Waziristan sem er við landamæri Afganistan eða nálægt hinum pakistanska smábæ Chitral. Ef Osama er í felum í Pakistan er líklegt að hann njóti stuðnings Waziri-ættbálksins sem lýtur ekki pakistönskum stjórnvöldum nema að nafninu til. Þegar við þetta bætist óblítt fjallalandslagið og efasemdir um raunverulegan samstarfsvilja pakistönsku leyniþjónustunnar er ljóst að það er ekki auðvelt fyrir Bandaríkjamenn að koma höndum yfir hann þrátt fyrir að þeir notist við þróaðan hlerunarbúnað við leitina.[heimild vantar]
