Misha Defonseca

Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Mardika mawi basa Jawi

Misha Defonseca (lair ing 12 Mei utawa 2 September 1937) iku sawijining penulis buku Amérika Sarékat asal Belgia. Dhèwèké nulis buku ajudhul Misha: A Mémoire of the Holocaust Years, sing jaréné minangka mémoaré nalika jaman Perang Donya II. Buku iki diterbitaké ing taun 1997. Vèrsiné ing basa Prancis didadèkaké film mawa judhul Survivre avec les loups ("Awèt urip karo sregala"). Nanging tanggal 29 Februari 2008, Defonseca liwat pengacarané ngaku yèn karyané iki namung fiksi waé kamangka sadurungé dikandhakaké karyané iki adhedhasar kisah nyata.

[sunting] Babad slira

Misha Defonseca sing jeneng asliné iku Monique de Wael, lair ing taun 1937 ing Etterbeek, cedhak Brussel, Belgia minangka putriné Robert De Wael lan Josephine Donvil. Kulawargané dudu kulawarga Yahudi, kaya ditulis otobiografiné, nanging kulawarga Katulik. Wong tuwané dadi laskar sing mbaléla lan mbrontak kaum Jerman Nazi lan mulané dipatèni wong Jerman sing kala kuwi njajah Belgia. Defonseca lan garwané, Maurice, pindhah menyang Amérika Sarékat saka Paris ing taun 1988 lan tuku omah ing Millis, Massachusetts. Maurice nganggur nganti tengahan taun 1990-an. Misha banjur miwiti crita marang kanca-kancané crita nalika dhèwèké isih enom; kudhu lelana nglintasi banawa Eropah, kamangka umuré lagi enem taun sawisé wong tuwané didéportasi ing taun 1941 lan direksa déning grombolan sregala sing awèh pitulung, matèni sawijining prajurit Jerman amerga béla dhiri, mlebu metu Ghetto Warsawa, lan wusanané bisa mulih menyang omah sawisé perang. Jane Daniel, sawijining penerbit buku, ngakon Defonseca nulis mémoir perkara mangsa ciliké sawisé krungu Defonseca crita bab iki ing sawijining sinagoga ing Massachusetts.

Sadurungé ditemokaké yèn crita iki tibakné palsu, buku iki wis ngasilaké sengkéta pengadilan antara Defonseca, Daniel lan penerbit bukuné ing Amérika. Daniel lan Defonseca garejegan perkara bathi buku iki sing laris banget. Ing 2005, pengadilan ing Boston ngakon Daniel mbayar Defonseca lan "penulis hantuné" Vera Lee $22,5 yuta. Para pengacara Defonseca kandha yèn Daniel durung mbayar dhuwité iki. Senadyan akèh sing seneng, buku iki uga ana sing ngritik amerga ana sawetara fragmèn sing ora logis utawa ora mungkin kedadéyan sacara historis. Salah sijiné kritikus sing ragu iku Henryk M. Broder, sing nulis sawijining biografiné Defonseca ing taun 1996 kanggo koran Jerman der Spiegel.^[1]

Ing sasi Februari 2008, sawijining surat baptis saka sawijining gréja ing Brussel kanggo Monique De Wael lan daftar ing sawijining SD cedhak omahé De Wael nudhuhaké yèn dhèwèké mlebu sekolah ing September 1943, rong taun sawisé Misha jaré lunga saka Brussel.

Ing tanggal 29 Februari 2008, Defonseca pungkasané ngaku yèn dhèwèké namung gawé-gawé waé lan critané iku namung fiksi waé lan dudu kisah nyata.