Camille Felgen
Vu Wikipedia, der fräier Enzyklopedie.
De Camille Jean Nicolas Felgen, bekannt als Camillo, gebuer de 17. November 1920 zu Téiteng a gestuerwen de 16. Juli 2005 zu Esch-Uelzecht, war e lëtzebuergesche Sänger, Radios-Speaker, Televisiouns-Animateur, Schlager-Textschreiwer a Schauspiller.
Inhaltsverzeechnis |
[Änneren] Säi Liewen
Nom Krich gouf de Camille Felgen Schoulmeeschter, huet dee Beruff awer schonns no 6 Méint nees un den Nol gehaangen, fir fir d'amerikanesch Arméi Dolmetscher ze ginn. Dono huet hie fir d'Zeitung La Meuse geschriwwen. Parallel huet hien e Schauspill- a Gesangsstudium zu Bréissel an zu Léck absolvéiert (bis 1949). 1946 huet hien als Noriichtespeaker a Sänger beim franséische Radiosprogramm vun RTL ugefaang. Mam Eugène Heinen huet hie Les Compagnons de la Scène gegrënnt.
1951 hat e säin éischten internationale Succès mam Lidd Bonjour les amis, der Erkennungsmelodie vum franséischen RTL-Programm. 1953 huet e seng éischt däitsch Plack, Onkel Toms altes Boot erausginn. 1953 kritt hie Congé sans solde, fir an den däitschsproochege Länner op Tournée ze goen. Hei huet hien sech och den Numm "Camillo" zougeluecht, well do den Don Camillo grad "in" war. An dëser Zäit fängt de Camille Felgen och un, Schlager-Texter (ënnert dem Pseudonym Jean Nicolas, sengen 2 anere Virnimm) fir Anerer ze schreiwen: et waren der Honnerten. E puer Joer drop gëtt hien Produktiounschef fir Radiosreklammen (an domatter och fir d'Musekprogramméierung) vun engem Saarbrécker Radio.
1958 huet hien den däitsche Radiosprogramm vun RTL op d'Bee gesat (De Begrëff Fröhliche Wellen ass och vun him). Hien huet déi éischt Hitparade iwwerhaapt op däitsch agefouert, an do bis 1968 als Chef-Speaker geschafft.
1960 an 1962 huet hie Lëtzebuerg beim Eurovision Song Contest vertrueden. 1960 gouf en zu London mam Titel Sou laang wéi s du do bass Leschten, 1962 zu Lëtzebuerg mat Petit Bonhomme ëmmerhin Drëtten. Zu senge bekannste Lidder op Däitsch zielt Sag warum?, e Lidd vum Phil Spector dat besonnesch a Frankräich mam Titel Toi qui te crois seul 1979 e grousse Succès hat (annerhallef Millioun verkaafte Placken), an Ich hab' Ehrfurcht vor schneeweißen Haaren (original Bobbejaan Ik heb eerbied voor jou grijze haren). 1963 huet e fir d'Beatles den däitschen Text vun hire Succèsen Komm gib mir deine Hand (I want to hold your hand) an Sie liebt dich (She loves you) geschriwwen. An den 1960er Jore stung hien um Héichpunkt vu senger Populariéit; et gouf eng 120 Camillo-Fancluppen.
Vun 1965 bis 1973 huet en 125 Mol d'Televisiounsemissioun Spiel ohne Grenzen/Jeux sans frontières geleet a moderéiert. Vun 1984 bis 1987 huet e beim nei gegrënnten däitschen Televisiounsprogramm RTL plus Wonschsendunge moderéiert. An den 1990er Joren huet e beim Radio RPR geschafft.
De Camillo Felgen huet och an e puer Filmer matgespillt: 1960 a Schlager-Raketen vm Erik Ode, wou e sech selwer gespillt huet; an dem engen oder anere Lidderfilm, wéi Mein Schatz, komm mit ans blaue Meer (1959) an an der Roll vun engem Paschtouer am Andy Bausch sengem Club des Chômeurs (2001) a La revanche (2004).
De Camille Felgen war 3 Mol bestued an hat, aus sengem 2. Bestiednes, 2 Kanner. Mat senger zweeter a mat senger leschter Fra hat hien e Moudegeschäft.
Am Joer 2004 huet den Andy Bausch en Documentaire vu 75 Minuten iwert de Camille Felgen gedréint: Monsieur Warum.
De Camille Felgen ass am Juli 2005 zu Esch gestuerwen.
[Änneren] CD
Camillo Felgen: Ich hab' Ehrfurcht vor schneeweissen Haaren, Bear Family Records, BCD 16317 AH.
-
- 1. : Ich hab' Ehrfurcht vor schneeweissen Haaren (Déi däitsch Versioun vum Bobbejaan sengem "Ik heb eerbied voor jouw grijze haren".)
- 2. : Wenn ein Stern vom Himmel fällt
- 3. : Schaukelstuhl, bleib niemals stehen
- 4. : Wann
- 5. : Unser Glück, Mon Amour
- 6. : Auch Du wirst einmal vergessen (& ELISABETH)
- 7. : Zwei in einem weissen Boot (& ELISABETH)
- 8. : Armer Piccolino
- 9. : Mitternachtslied
- 10. : Das kleine Märchen
- 11. : Wanderer ohne Sterne
- 12. : Sag, warum?, Lauschtert de Mr. "Warum" Déi däitsch Versioun vum Phil Spector sengem Oh!Why? gesonge vun den "Teddy Bears"
- 13. : Golden Mary
- 14. : Schwarzer Pierrot
- 15. : Er ist ein Freund von mir
- 16. : Du kleiner Mann
- 17. : Bye Bye
- 18. : Irgenwann erwacht ein neuer Tag
- 19. : Bracero
- 20. : Hoch in den Bergen von Mexico
- 21. : Nur ein Schatten
- 22. : An Daddy persönlich
- 23. : Der Junge aus der Via Gluck
- 24. : Ferne und Einsamkeit
- 25. : Heut' abend kommt die Liebe
- 26. : Edelweiss
- 27. : Wie damals
- 28. : Mon Amour, Tu m'attendras
[Änneren] Filmer
- Monsieur Warum (2004) (Regie : Andy Bausch)
- La Revanche (2004) (Regie : Andy Bausch)
- Le Club des Chômeurs (2001) (Regie : Andy Bausch)
- Schlagerparade (1960) (Regie: Franz Marischka)
- Schlager-Raketen (1960) (Regie: Erik Ode)
- Das Nachtlokal zum Silbermond (1960) (Regie: Wolfgang Glück)
- Mein Schatz, komm mit ans blaue Meer (1959) (Regie: Rudolf Schündler)
- Wenn die Conny mit dem Peter (1958) (net genannt) (Regie: Fritz Umgelter)
