Economie vun Australien
Vu Wikipedia, der fräier Enzyklopedie.
Inhaltsverzeechnis |
[Änneren] D'Land a seng Ressourcen
[Änneren] Agrikultur
Obwuel de Secteur vun der Agrikultur hautdesdaags bei wäitem net méi sou wichteg ass wéi fréier, hänkt awer nach ëmmer e groussen Deel vum Räichtum vum Land vun der Zuucht vu Randbéischten a vun der Landwirtschaft of. D'Traditioun, fir Béischte weeden ze loossen, ass zur Zäit vun der Kolonisatioun gebuer ginn, wéi déi éischt spuenesch Schof aus Südafrika agefouert goufen. D'Weede breede sech haut op ongefeier 90% vun der benotzbarer Fläch aus. Australien as den éischte Produzent an Exportateur vu Woll op der Welt, besonnesch vun der Mérinos Woll, déi vu besserer Qualitéit ass. Trotzdem maachen d'Beneficë vum Export vun der Woll haut nëmmen ongeféier 8% vun den Totalbeneficer op der Exportatioun aus. Ongeféier d'Hallschent vun der Woll gëtt an New South Wales a Western Australia produzéiert. De Staat Victoria ass deen éischte Produzent vu Schoofs-Fleesch.
All d'Staaten an Territoire vun Australien praktizéieren d'Véizuucht, mee Queensland ass den éischte Produzent, mat ongeféier 40% vun der Kappzuel, déi am Unfank vun den 1990er Joren ongeféier 23,6 Milliounen Käpp staark war.
Australien produzéiert grad esou gutt Fleesch- wéi och Mëllechartikelen. D'Mëllechindustrie ass haaptsächlech an dem Süd-Osten (besonnech am Victoria) ze lokaliséieren, well et do méi reent. D'Farme sinn technologesch an der Spëtz vun deem wat sech haut maache léisst, am Géigesaz zu deem Bild, wat ee gäre kritt, wann ee sech Sendungen iwwer den Outback ukuckt. Déi riseg Ranchen am Norden zum Beispill benotzen dacks a gären Helikopteren a Motorrieder fir hier Träpp beieneen zehalen. Unfanks vun den 1990er Joren huet d'Randfleeschproduktioun bal 1,8 Milliounen Tonnen, an d'Mëllechproduktioun 7,3 Milliounen Liter ausgemaach.
Obwuel nëmmen ongeféier 10% vun der Gesammtfläch vun Australien fir "cultures alimentaires" ze gebrauche sinn, ass dëse Secteur ganz wichteg fir d'australesch Economie. De Weess mécht ongeféier 45% vun der ungebautener Fläch aus. D' Fudderplanzen an aner Fruuchtzorte maachen ongeféier 20% aus. De Weessubau as extrem mechaniséiert, a gëtt an alle Staate praktizéiert. Den Ubau ass awer och haaptsächlech am Süd-Osten a Süd-Westen ungesidelt. Allgemen huet d'absolut Produktioun an de leschte Joren ëmmer méi ofgeholl, well d'Leit op nei, méi rentabel, Zorten ëmklammen.
Den Huewer, de Geescht, de Kar, de Mais an den Tubak spillen och eng wichteg Roll. Räis a Kotteng ginn haaptsächlech an der Reenzon em de Murrumbidgee Floss am Queensland an an New South Wales ugebaut. Den Zockerrouer-Ubau ass op Queensland an am Distrikt vu Richmond River an New South Wales beschränkt, well do de beschten Buedem existéiert. 1992 sin ongeféier 20,3 Milliounen Tonnen Zockerrouer produzéiert ginn. Et ginn och vill Friichten ungebaut, ënnert anerem Äppel, Bananen, Drauwen, Orangen, Bieren, Ananasen an Papayaen. D'Haaptubaugebidder fir de Wäin sin d'Däller vu Barossa a South Australia, den Hunter Valley an New South Wales a verschidde Regiounen a Victoria, besonnesch awer den Dall vum Murray-Floss.
D'Bëscher bedecken hautesdaags nëmmen nach eng Fläch vun ongeféier 8%. De Groussdeel vum Holz dat fir de Commerce bestëmmt ass, gëtt aus Nolenholzbëscher gewonnen. D'Eukalyptus-Holz gëtt haaptsächlech fir d'Miwwelproduktioun benotzt. Ongeféier 9.4 Milliounen Hektar si permanent geschützt.
D'australesch Waasserfläche bidden ongeféier 2000 verschiddenen Zorte vun Fësch, an enger Hellewull anere maritime Liewewiesen, e Liewensraum. D'Ausbeut vun de Waasserflächen duerch Fëscherei ass awer zimlech kleng, mat ongeféier 225 000 Tonnen am Joer. Interessant ass an deem Sënn datt ongeféier 50% vun de Recettë vun de Crustacéeë kommen.
Australien war bis zum Schluss vun den 1970er Joren eng vun de gréisste Walfänkernatiounen, mee huet zënterhir déi Aktivitéit, ausser fir "wëssenschaftlech Zwecker", opginn.
