Kulturzentrum Kulturfabrik
Vu Wikipedia, der fräier Enzyklopedie.
De Kulturzentrum Kulturfabrik (Centre Culturel Kulturfabrik) ass en Zentrum fir modern an zäitgenëssesch Konscht. En ass zu Esch-Uelzecht an de Gebaier vum fréiere Schluechthaus an der Lëtzebuerger Strooss ënnerbruecht.
[Änneren] Geschicht
D'Schluechthaus gouf 1885-86 gebaut an 1979 zougemaach, well en neit Gebai am Quartier Raemerech gebaut gi war. Am Wanter 1980 huet den Ed Maroldt den ale Killraum als Kuliss fir d'Theaterstéck Das Konzert zum Heiligen Ovid genotzt, dat e mat Schauspiller aus dem Escher Jongelycée an dem Kasemattentheater opgefouert huet.
1982 huet d'Theater GmbH, eng Trupp vu jonke Schauspiller, ugefaangen, de Killraum als Theatersall ëmzebauen. Geschwënn dono huet sech d'Galerie Terres Rouges an de Gemaier niewendrun niddergelooss, aner Kënschtler, Schauspiller a Musiker hu sech ugeschloss, an de Kino am Schluechthaus, kuerz Kinosch, huet seng Dieren opgemaach.
1983 huet sech d' Kulturfabrik asbl konstituéiert, déi d'Gebaier frësch ugestrach huet, Atelieren a Proufsäll ageriicht, an an de Joren duerno e räichhaltege Kulturprogramm op d'Been gestallt huet, dorënner Theateréischtopféierungen, Filmfestivaler a Summerakademiën.
Mee dat ganz ass aus enger prekärer Lag eraus geschitt: D'Gemeng Esch, deeër d'Gebai gehéiert huet, hat laang keen Intressi drunn, nieft dem Escher Theater nach e Kulturzentrum ze subventionéieren, an huet mam Gedanke gespillt, den Terrain ze verkafen. An d'Gebaier hu missen am Fong restauréiert ginn, fir se virum Zerfall ze hënneren.
1993 huer sech dann awer eng Léisung ugedeit, wéi de Wirtschaftsministère Suen vum europäesche FEDER- Programm kunnt geneemegt kréien, an esou eng Kofianzéierung vun der Renovéierung mam Lëtzebuerger Staat an der Gemeng Esch méiglech war.
Am Dezember 1996 gouf eng Conventioun tëschent Staat, Gemeng an der Kulturfabrik asbl ënnerschriwwen, déi d'Asbl als Trägerveräin vum Kulturzentrum Kulturfabrik confirméeiert huet an no deër Staat a Stad bei der Finanzéierung vun de Betriibskäscht bäidroen.
De 15. Januar 1997 hunn d'Renovatiounsaarbechten ugefaangen, déi bis den Oktober 1998 gedauert hunn. Zënterhir besteet et aus engem groussen an engem klenge Sall, engem Keramikatelier, engem Bistro (K116), dem Kinosch, dem Ratelach, Proufsäll, dem "Infoladen Schréibs" a Säll fir Les Linos.
