Liberal Liga

Vu Wikipedia, der fräier Enzyklopedie.

D'Liberal Liga (offiziell: Ligue Libérale) war eng politesch Partei zu Lëtzebuerg tëscht 1904 an 1925. Si war indirekt d'Vigängerpartei vun der haideger Demokratescher Partei (DP).

D'Liberal Liga, déi, wéi hiren Numm et seet, enger liberaler Stréimung ugehéiert huet, ass 1904 entstanen, andeems sech verschidde Gruppéierungen, déi et an der Chamber gouf, fomell zesummegedunn hunn. D'Grënnungsversammlung war de 17. Januar an der Villa Louvigny. Éischte Pressident war den Alphonse Munchen. D'Liberal Liga hat hier Basis virun allem an de Mëttelse Klassen. Zesumme mat der Sozialistescher Partei huet si ufanks de sougenannte Lénksblock an der Chamber forméiert. Dësen huet sech géint den Afloss vun der Kierch, virun allem an der Schoul, gewiert, an e kunnt sech dann och beim Vote vum Schoulgesetz vun 1912 duerchsetzen.

Den Haaptmann vun der Liberalen, de Paul Eyschen, dee 27 Joer laang Premierminister war (vun 1888 bis zu sengem Doud 1915), war, trotz der Ënnerstëtzung vu senger Regierung an der Chamber duerch d'Liberal Liga, ni e Member dovunner (wéi iwregens och seng Ministeren net). Dëst war mat ee vun de Grënn, dass nom Eyschen sengem Doud trotz liberaler Dominanz, d'Regierunge vum Mathias Mongenast an déi vum Victor Thorn hu missen zerécktrieden.

Nom Éischte Weltkrich huet d'Liberal Liga manner Stëmme kritt; Grënn heifir waren ë.a. d'Aféiere vum Allgemenge Walrecht an de Fait, dass déi nei Politiker, déi bäikoumen, manner Ënnerstëtzung fonnt hunn wéi déi "al Garde" an de Joere virdrunn.

Sou koum et dann och derzou, dass d'Liberal Liga 1924 auserneegebrach ass, an 3 separat Parteie gegrënnt goufen: d'Radikal Sozialistesch Partei (Parti socialiste radical), d'Liberal Lénk (Gauche libérale) an d'Radikal Partei (Parti radical).

1934 hunn dës 3 Parteien sech nees ënnert dem Numm Radikal-Liberal Partei (Parti radical-libéral) vereenegt, aus deem dann nom Zweete Weltkrich déi haideg DP ervirgaangen ass.