Revue (Zäitschrëft)
Vu Wikipedia, der fräier Enzyklopedie.
Revue ass den Numm vun enger Lëtzebuerger Zäitschrëft, déi den 1. September 1945 ënnert dem Titel Revue. Letzeburger Illustre'ert erauskoum.
Fir d'éischt koum d'Revue all 14 Deeg eraus, vun 1949 un all Woch. Gegrënnt gouf se vum Émile Probst deen se awer no 2 Joer un de Verlag Bourg-Bourger verkaf huet.
Den Erfolleg an de foffzeger Joren hat d'Revue engem Abonnementsystem ze verdanken, dat am Ländche komplett nei war. Wann een d'Revue abonnéiert huet, konnt een automatesch a gratis vun enger Liewensversécherung profitéieren déi den Iwwerliewenden, am Fall vu sengem Dout, 10.000 Frang ausbezuelt huet. Och d'Säite mat den Houchzäitskoppelen hu vill Lieser bei der Staang gehalen.
Ausserdeem hat d'Revue scho fréi eng Comic-Säit, déi vum Gab Weis gezeechent gouf. Mil's Abenteuer hu jorelaang d'Jugend an Otem gehalen. Nach haut profitéiert d'Revue vun hire Comic-Säite vum Superjhemp, gezeechent vum Roger Leiner mat Blose vum Lucien Czuga.
Och ville Concoursen huet d'Zäitschrëft hire joerzéngtelaange Succès ze verdanken, deen eréischt duerch den Télécran 1978 eng staark Konkurrenz krut.
D' Revue huet sech am Ufank als Familljemagazin verstanen, dat sech duerch e méi moderne Look an d'Auswiel vun den Themen vun de Publikatiounen aus dem St.-Paulus-Verlag ofzehiewen wousst. Am Laf vun der Zäit huet se sech och, mol méi, mol manner, gesellschaftpoliteschen Themen ugeholl. Zënter dem Enn vun den 1960er Joren huet d'Revue eng Bäiluecht mat den Televisiounsprogrammer, déi zu Lëtzebuerg z'emfänke sinn an déi haut den titel TéléRevue huet.
[Änneren] D'Revue haut
D'Revue gëtt haut vun Éditions Revue s.a. erausginn, a gehéiert zënter 2000 zu der Editpress. Direkter ass de Guy Ludig.
2005/2006 hunn, der Etude Plurimedia no, duerchschnëttlech 23,8 % vun der Lëtzebuerger Bevëlkerung iwwer 15 Joer bannent enger Woch d' Revue gelies. 2006 huet d' Revue 319.751 € staatlech Pressehëllef kritt.
2007 huet d' Revue eng Oplo vu knapps 25.000.
