Конгрес на Соединетите Американски Држави

Од Википедија, слободна енциклопедија

Конгресот на Соединетите Американски Држави (англ. United States Congress) е дводомно легислативно тело на федералната влада на САД кое се состои од Сенат и Претставнички дом. Сенаторите и претставниците се избираат на директни избори.

Претставничкиот дом има 435 претставници кои ги преставуваат своите изборни единици во период од две години. Местата во Претставничкиот дом се сразмерно поделени помеѓу сојузните држави според нивната популација. Во Сенатот, секоја сојузна држава на САД е претставена со по двајца од вкупно 100-те сенатори. Секои две години се избираат приближно една третина од сенаторите во Сенатот, а тие имаат 6-годишен мандат.

Целокупната законодавна власт на САД е во рацете на Конгресот. Иако имаат некои специфични улоги предвидени со уставот на САД, Претставничкиот дом и Сенатот се рамноправни партнери во законодавниот процес: законите не можат да се донесат без согласност од обата дома.

Конгресот се среќава во Капитолот на САД, во Вашингтон, Дистрикт на Колумбија.