വി.കെ. കൃഷ്ണമേനോന്
വിക്കിപീഡിയ, ഒരു സ്വതന്ത്ര വിജ്ഞാനകോശം.
ഇന്ത്യയുടെ നയതന്ത്രരംഗത്തെ മഹാസ്തഭം എന്നു വിശേഷിക്കവുന്ന വ്യക്തിയാണ് വി.കെ. കൃഷ്ണമേനോന്. സ്വാതന്ത്ര്യാനന്തരം ഇന്ത്യയുടെ അന്താരാഷ്ട്രരംഗത്തെ ഇടപെടലുകള് പ്രധാനമായും കൃഷ്ണമേനോനെ മുന്നിര്ത്തിയായിരുന്നു. നെഹ്രുവിന്റെ വലംകയ്യായിരുന്നു അദ്ദേഹം. ചേരി ചേരാ പ്രസ്ഥാനത്തിന് രുപം കൊടുക്കുന്നതിന് അദ്ദേഹം വഹിച്ച പങ്ക് വളരെ വലുതാണ്. അദ്ദേഹത്തിന്റെ പ്രസംഗവൈഭവം പ്രസിദ്ധമാണ്, കശ്മീര് പ്രശ്നത്തില് ഇന്ത്യയുടെ നിലപാടിനെക്കുറിച്ച് നീണ്ട 8 മണിക്കൂറാണ് അദേഹം ഐക്യരാഷ്ട്രസഭയില് പ്രസംഗിച്ചത്. ഈ റെക്കോര്ഡ് ഇതുവരെ തിരുത്തപ്പെട്ടിട്ടില്ല.
ഉള്ളടക്കം |
[തിരുത്തുക] ജീവിതരേഖ
കോഴിക്കോട് ജില്ലയിലെ പന്നിയങ്കരയിലെ വെങ്ങലില് കുടുബത്തിലാണ് മേനോന് ജനിച്ചത്. അക്കാലത്ത് കേരളത്തിലെ ഒരു സമ്പന്നകുടുംബമായിരുന്നു വെങ്ങലില് കുടുംബം. അച്ഛന് കോമത്ത് കൃഷ്ണക്കുറുപ്പ് കോഴിക്കോട് കോടതിയിലെ വക്കീലായിരുന്നു. പ്രാഥമിക വിദ്യാഭ്യാസം തലശ്ശേരിയിലയിരുന്നു പിന്നീട് അദ്ദേഹം മദ്രാസ് പ്രസിഡന്സി കോളേജില് വിദ്യാഭ്യാസം പൂര്ത്തിയാക്കി. കോളേജില് വച്ച് അദ്ദേഹം ദേശിയപ്രസ്ഥനത്തില് ആകൃഷ്ട്നാകുകയും ആനിബസന്റ് ആരംഭച്ച ഹോംറൂള് പ്രസ്ഥാനത്തില് ചേരുകയും ചെയ്തു. ആനിബസന്റ് അദേഹത്തെ ഇംഗ്ലണ്ടിലേക്ക് വിദ്യാഭ്യാസം ചെയ്യാന് പറഞ്ഞയച്ചു.
[തിരുത്തുക] ലണ്ടനില്
ബ്രിട്ടണിലെത്തിയ മേനോന് ലണ്ടന് സ്കൂള് ഓഫ് എക്കൊണോമിക്സിലും ലണ്ടന് യൂണിവേഴ്സിറ്റി കോളെജിലും ഉപരിപഠനം നടത്തി. ഇന്ത്യയ്ക്കു സ്വാതന്ത്ര്യം നല്കുവാനുള്ള പ്രധാന വക്താവുമായി അദ്ദേഹം. പത്രപ്രവര്ത്തകനായും ഇന്ത്യാ ലീഗിന്റെ സെക്രട്ടറിയായും (1929-1947) പ്രവര്ത്തിച്ചു. ഈ കാലഘട്ടത്തിലാണു ജവഹര്ലാല് നെഹ്രുവുമായി പരിചയപ്പെടുന്നത്. 1934-ല് മേനോന് ലണ്ടന് ബാറിലേക്ക് തിരഞ്ഞെടുക്കപ്പെടുകയും ലേബര് പാര്ട്ടിയില് ചേര്ന്നു സെന്റ് പാന്ക്രിയാസിലെ ബറോ കൌണ്സിലറായി തിരഞ്ഞെടുക്കപ്പെടുകയും ചെയ്തു.
ലണ്ടന് ബാര് കൌണ്സില് അംഗമായെങ്കിലും അധികം പണം സമ്പാദിച്ചില്ല. തന്റെ വരുമാനമെല്ലാം ഇന്ത്യാ ലീഗിന്റെ പ്രവര്ത്തനങ്ങള്ക്കു ചിലവാക്കുകയായിരുന്നു അദ്ദേഹം. ലണ്ടന്ലെ കാംഡന് പ്രദേശത്തെ ചിലവുകുറഞ്ഞ തൊഴിലാളി പാര്പ്പിടങ്ങളിലായിരുന്നു താമസം.പത്തുവര്ഷത്തോളം 57 കാംഡന് സ്ക്വയര് എന്ന വിലാസത്തില് താമസിച്ചു.
സെന്റ് പാന്ക്രിയാസ് (ലണ്ടന്) അദ്ദേഹത്തിന് ‘Freedom of the Borough' എന്ന ബഹുമതി സമ്മാനിച്ചു. ബര്ണാര്ഡ് ഷായ്ക്കു ശേഷം ഈ ബഹുമതി ലഭിക്കുന്നത് കൃഷ്ണമേനോനാണ്. 1932-ല് അദ്ദേഹം ഇന്ത്യയിലെ സ്ഥിതിഗതികള് പഠിക്കുവാന് ഒരു പഠനസംഘത്തെ അയക്കുവാന് പ്രേരിപ്പിക്കുകയും ലേബര് പ്രഭുസഭാംഗമായ എല്ലെന് വില്കിന്സണ് നയിച്ച ഈ സംഘത്തില് സെക്രട്ടറിയായി പ്രവര്ത്തിക്കുകയും ചെയ്തു. ഈ സംഘത്തിന്റെ ‘ഇന്ത്യയിലെ സ്ഥിതിഗതികള്’ എന്ന റിപ്പോര്ട്ട് തയാറാക്കിയത് മേനോനാണ്. 1930കളില് അല്ലെന് ലേനുമായി ചേര്ന്ന് അദ്ദേഹം ‘പെന്ഗ്വിന്’, ‘പെലിക്കണ്’ എന്നീ പ്രശസ്തമായ പുസ്തക പ്രസാധക കമ്പനികള് സ്ഥാപിച്ചു. ‘ബോള്ഡ്ലി ഹെഡ്‘, ‘പെന്ഗ്വിന് ബുക്സ്’, ‘പെലിക്കണ് ബുക്സ്’, ‘റ്റ്വെല്ത് സെഞ്ചുറി ലൈബ്രറി’ എന്നിവയില് ലേഖകനായി പ്രവര്ത്തിച്ചു.
1930കളില് നെഹ്രുവുമൊത്ത് ജനറല് ഫ്രാങ്കോയുടെ യുദ്ധം കാണുവാനായി സ്പെയിനിലേക്കു പോയി. അപകടകരമായ ഈ യാത്ര ഇരുവരെയും തമ്മില് അടുപ്പിച്ചു. നെഹ്രുവിന്റെ മരണംവരെ ഇരുവരും അന്യോന്യം തികഞ്ഞ വിശ്വസ്തതയും സൗഹൃദവും പുലര്ത്തി.
1979-ല് ലണ്ടനിലെ ഫിറ്റ്സ്രോയ് സ്ക്വയര് ഉദ്യാനത്തില് അദ്ദേഹത്തിന്റെ ഒരു അര്ദ്ധകായ വെങ്കലപ്രതിമ സ്ഥാപിക്കപ്പെട്ടു. ഈ പ്രതിമ രണ്ടുതവണ മോഷണം പോയി. ഇന്ന് കാംഡന് സെന്ററില് മേനോന്റെ പ്രതിമ സൂക്ഷിച്ചിരിക്കുന്നു.
[തിരുത്തുക] ഇന്ത്യാ ഹൈക്കമ്മീഷനില്
ഇന്ത്യക്കു സ്വാതന്ത്ര്യം ലഭിച്ചശേഷം ഇന്ത്യയുടെ ബ്രിട്ടനിലെ സ്ഥാനപതിയായി 1947 മുതല് 1952 വരെ കൃഷ്ണമേനോന് നിയമിക്കപ്പെട്ടു. 1952 മുതല് 1962 വരെ ഐക്യരാഷ്ട്രസഭയില് ഇന്ത്യയുടെ സ്ഥാനപതിയായിരുന്നു. ഐക്യരാഷ്ട്രസഭയില് കൃഷ്ണമേനോന് ചേരിചേരാ നയത്തിന്റെ വക്താവാകുകയും, അമേരിക്കന് നയങ്ങളെ എതിര്ക്കുകയും ചൈനയെ പല അവസരങ്ങളിലും പിന്താങ്ങുകയും ചെയ്തു. 1957 ജനുവരി 23നു ഇന്ത്യയുടെ കശ്മീര് പ്രശ്നത്തിലെ നിലപാടിനെക്കുറിച്ച് 8 മണിക്കൂര് ദൈര്ഘ്യമുള്ള ഒരു പ്രസംഗം നടത്തി. ദൈര്ഘ്യത്തിന്റെ കാര്യത്തില് ഐക്യരാഷ്ട്രസഭയുടെ ഇന്നുവരെയുള്ള ചരിത്രത്തിലെ തന്നെ റെക്കോര്ഡാണ് ഈ പ്രസംഗം.
[തിരുത്തുക] ഇന്ത്യന് പാര്ലമെന്റില്
1953-ല് കൃഷ്ണമേനോന് രാജ്യസഭാംഗമായി തിരഞ്ഞെടുക്കപ്പെട്ടു. 1956-ല് കേന്ദ്രമന്ത്രിസഭയില് വകുപ്പില്ലാമന്ത്രിയായി നിയമിതനായി. 1957-ല് ബോംബെയില് നിന്നു അദ്ദേഹം ലോക്സഭയിലേക്കുതിരഞ്ഞെടുക്കപ്പെടുകയും 1957 ഏപ്രിലില് ഇന്ത്യയുടെ പ്രതിരോധമന്ത്രിയായി അവരോധിക്കപ്പെടുകയും ചെയ്തു.
1962ലെ ഇന്ത്യാ-ചൈനാ യുദ്ധത്തിലെ പരാജയത്തെയും ഇന്ത്യന് സൈന്യത്തിന്റെ തയ്യാറെടുപ്പില്ലായ്മയെയും മുന്നിര്ത്തി അദ്ദേഹത്തിനു രാജിവെയ്ക്കേണ്ടിവന്നു. 1967ലെ തിരഞ്ഞെടുപ്പില് പരാജയപ്പെട്ടെങ്കിലും 1969-ല് വീണ്ടും തിരഞ്ഞെടുക്കപ്പെട്ടു.
[തിരുത്തുക] മരണം
കൃഷ്ണമേനോന് 1974 ഒക്ടോബര് 6നു ദില്ലിയില് വെച്ചു മരണമടഞ്ഞു.