Benedikt XVI.

Vun Wikipedia

Benedikt XVI., mit börgerlichen Namen Joseph Alois Ratzinger (* 16. April 1927 in Marktl an’n Inn, Düütschland) is siet den 19. April 2005 de Bischop vun Rom un somit Paapst vun de Kathoolsche Kark un de Staatsböverste vun den Vatikan.

Ratzinger is an’n 29. Juni 1951 in den Dom to Freising to’n Preester weeht wurrn. 1953 hett he an de Universität München sienen Doktor maakt (Dr.theol.). 1957 hett he sik an de sülbige Universität habiliteert un is Perfessor wurrn. Sienen akademischen Loop füng he 1958 as Professor för Dogmatik un Fundamentaltheologie an de Philosophisch un Theologisch Hoochschool Freising an. 1959 wessel he nah Bonn, 1963 güng he nah Mönster in Westfalen, 1966 föhr em sien Weg nah Tübingen un 1969 keem he denn in Regensborg ünner.

Man as em Paapst Paul VI. in’n März 1977 to’n Arzbischop vun München un Freising beropen hett, weer dat mit sienen akadeemschen Loop toenn un he möß een Amt in de Karken öbernehmen. An’n 22. Juni 1977 is he al to’n Kardinal maakt wurrn.

De nee Paapst Johannes Paul II. hett em al up’n 25. November 1981 vun sienen Bischopssetel wegropen un nah Rom holt. Dor is he Vörsitter vun de Globenskongregation wurrn. 1992 hett de Paapst em to’n Kardinalbischop vun Velletri-Segni maakt un 1998 is he tweede Mann (Subdekan) vun dat Kollegium vun de Kardinalen wurrn. 2002 keem he as Kardinaldekan an de Topp vun düt Kollegium. Dormit is he automaatsch ok noch Kardinalbischop vun Ostia wurrn.