Врховен македонски комитет

Од Википедија, слободна енциклопедија

Врховниот македоно-одрински комитет (ВМОК) е создаден како раководно тело на Македонско-одринската организација, која ги обединувала емиграциите од Македонија и Одринско во Бугарија, и била наследник на организациите Млада македонска дружина и Братски сојуз. Овие две организации ги претставувале двата ставови во однос на решавање на Македонското прашање - легалната политичка борба и вооружената револуционерна борба.

Од 19 до 28 март 1895 година во Софија се спроведува обединувачки конгрес со учесвото на 61 пратеници на македонските друштва, братства и колонии во Бугарија и Романија. Конгресот, кој останал во историјата со името Прв македонски конгрес, официјално ја основал заедничката организација со цврста цел, програма и структура. За нејзино раководно тело бил избран Македонски комитет (МК), кој избрал извршно биро со претседател Трајко Китанчев.

Конгресот донесол решенија кои ја добиле формата на Устав на организацијата. Според нив целта била ...придобивање за населението во Македонија и Одринско политичка автономија, гарантирана од Големите сили...

Од почетокот на постоењето Комитетот бил тесно поврзан со внатрешно-политичкиот живот во Бугарија. Комитетот се создал во време на политичката диктатура на Стефан Стамболов. Во првите раководства на Комитетот, власта ја презеле опозиционите бугарски партии. Независните македонски дејци биле во малцинство.

Во движењето масовно се зачлениле многумина политички дејци, кои го употребувале во нивните внатрешно-политички борби, и така многу му наштетиле.