Esdörp

Esdörp is ene Gemeend in de Samtgemeen Olendörp. Dat liggt in’n Landkreis Stood in Neddersassen. To de Gemeend höört de dree Dörper Esdörp, Gröpel un Beeß.

Inwahners hebbt de Öörd (Stand 2006):

Esdörp: 674 Inwahners
Gröpel: 700 Inwahners
Beeß: 157 Inwahners

Inholtsverteken

1 Geografie
2 Historie
- 2.1 Inwahnertall
3 Politik
- 3.1 Gemeenraat
- 3.2 Wapen
4 Weertschop
- 4.1 Verkehr
- 4.2 Scholen
5 Literatur
6 Weblenken

[Ännern] Geografie

De Gemeend liggt in’n Westen vun’n Landkreis Stood an de Oost. In’n Noorden grenzt se an de Gemeend Kronenborg mit dat Dörp Brobargen. In’n Oosten liggt de Gemeend Olendörp.

In’n Süden un Westen liggt de Dörper Öölmerheid, Öölm, Nieder-Ochtenhusen, Ottendörp un Ostendörp, de all to de Gemeend Bremervöör höört. Bi Ostendörp reckt de Gemeend mit de Gemarkung vun Gröpel as eenzig Rebeet in’n Landkreis blangen en Deel vun Brobargen op dat linke Siet vun de Oost.

[Ännern] Historie

De Gemenen Gröpel un Beeß sünd 1972 bi de Kommunalreform in Neddersassen to de Gemeend Esdörp kamen.

[Ännern] Inwahnertall

Johr	1910	1925	1933	1939	2006
Inwahners	526	509	525	499	674

[Ännern] Politik

[Ännern] Gemeenraat

Sittverdelung in’n Gemeenraat
Johr	CDU	SPD	Wählergemeenschop
2001	3	3	5
2006	4	4	3

[Ännern] Wapen

Dat Wapen vun de Gemeend Esdörp hett de Gemeenraat an’n 21. September 1973 beslaten un is den 17. Dezember 1973 vun’n Regerungspräsident in Stood genehmigt worrn.

Dat Wapen wiest vörn op gröön en sülvern afhaun Boomstamm mit twee Aststümp op jede Siet, de mit de Spitz na buten wiest. Achtern is op sülvern Grund en gröön Grapen mit twee sülvern Bannen afbillt. Övern Grapen sünd twee gröne, krüüzte Peerköpp, de na buten kiekt.

De Stamm kummt ut dat Wapen vun de ehmaligen Herren vun Esdörp. Dat Motiv stammt ut dat Wapen vun dat Dörp Esdörp.

De Grapen is en redendes Symbol för Gröpel, dat den Grapen ok in’t Wapen hett.

De krüüzten Peerköpp staht för Beeß un siene Neddersassenhüüs.

[Ännern] Weertschop

[Ännern] Verkehr

Dör Esdörp löppt de Kreisstraat 114, de bi Himmelporten an de Bundsstraat 73 rangeiht, de denn na Stood un Hamborg wiederföhrt. Bi Öölm hett de K 114 Ansluss an de Bundsstraat 74 na Bremervöör. Vun Gröpel ut geiht de Kreisstraat 82 na Brobargen. Verkehr mit de linke Siet vun de Oost is blot in’n Sommer över de lütte Gröpler Prahmfähr mööglich oder ans över de faste Brüch över de Oost in Bremervöör.

[Ännern] Scholen

Esdörp hett ene Grundschool. Op Haupt- un Realschool gaht de Schölers na dat Schoolzentrum Olendörp un op Gymnasium na de Vincent-Lübeck-School in Stood. Fröher harr ok Gröpel en Grundschool, de denn later en Deel vun de Esdörper Grundschool weer un de dat nu gornich mehr gifft. Dor is nu en Kinnergoorn binnen.