Irakkrieg

From Wikipedia

De Irakkrieg weer en Krieg vun de USA un annere, verböndte Staten (in'n speziellen Grootbritannien un Australien) gegen den Irak. Offiziell hebbt dörtig Länner vun de Eer Solidarität mit de USA toseggt („Koalitschoon vun de Willigen“). De USA, Grootbritannien un Australien hebbt den Krieg mit Resolutschoon 687 vun de Vereenten Natschonen legitimeert. De Irak hett sik aver nich an de Uplagen hollen un de Wapenstillstand hett dormit keen Grundlaag un de Krieg kunn wedder upnommen warrn. Dorto kummt ut Sicht vun de USA Resolutschoon 1441, wat „eernste Konsequenzen“ för den Irak bi mangeln Kooperatschoon fastleggt.

Bannig vele Länner un Völkerrechtler gahn dorvun ut, dat bede Resolutschonen kenen utreken Grund för en Krieg ween sünd un dat de Krieg somit nich recht is. Vele Lüüd hebbt den Indruck dat de USA annere Interessen in den Krieg verfolgt as Interessen vun de Öölwertschap oder geostrategisch Interessen.

[Ännern] Militärisch Afloop

De Krieg fung an mit dat Bombardeern vun Bagdad an den 17. März 2003. An den 23. März sünd Boddentruppen ut Kuwait folgt. Briten hebbt in'n Süden ehrn Swoorpunkt hebbt, de USA in'n Noorden vun den Irak, Bagdad insloten. In den Nordirak hebbt de USA verbönne Kurden ünnerstütt.

Vun den 3. April to den 9. April hebbt de Amerikaner Bagdad innehmen. Saddam Hussein, de iraksche Präsident, is siet de amerikansch Sieg verschollen wesen (bet Dezember 2003). Vele kulturelle Göder vun de ollen Babylonier un Sumerer sünd bi Plünnern ok afhannen kamen.

Achter den Krieg harr de USA dat Updelen vun den Irak in dree Sektoren plant: een amerikanschen, een britischen un een poolschen Sektor. So is dat denn kamen.

Hüüt hebbt de US-Truppen un de Briten grote Problemen Sympathien bi de iraksche Lüüd to kriegen. Elk Dag weren en poor alliierte Soldaten ümbracht oder verwundt un islamistische Terroristen kriegt bannig veel Toloop vun de irakschen Lüüd - speziell vun de jungen Lüüd.

An'n 13. Dezember 2003 hebbt de Amerikaner Saddam Hussein to faten kriggt. He hett sik bi sien Heimatstadt Tikrit in en Eerdlock versteken.