Landkreis Rodenborg (Wümm)
From Wikipedia
| Wapen | Koort |
|---|---|
 |
 |
| Grunddaten | |
| Bundsland: | Nedersassen |
| Kreisstadt: | Rodenborg (Wümm) |
| Flach: | 2.070,02 km² |
| Inwahners: | 164.875 (31. Dezember 2005) |
| Inwahnerdicht: | 79,6 |
| Kreisslötel: | 03 3 57 |
| Kfz-Kennteken: | ROW |
| Updeelen: | 57 Gemenen |
| Adress vun’n Kreisverwalten: |
Hopfengarten 2 27356 Rotenburg (Wümme) |
| Websteed: | http://www.landkreis-rotenburg.de/ |
| Landraat: | Hermann Luttmann (CDU) |
| Koort | |
 |
|
De Landkreis Rodenborg (Wümm) is en Landkreis in’n Noordoosten vun Neddersassen twüschen Bremen, Bremerhaven un Hamborg. Nöömt is de Landkreis na de Kreisstadt Rodenborg (Wümm). In’n Westen grenzt de Kreis Rodenborg (Wümm) an de Landkreisen Veern, Oosterholt un Cuxhaven, in’n Noorden an’n Landkreis Stood, in’n Oosten an’n Landkreis Horborg un in’n Süüden un Südoosten an den Landkreis Soltau-Fallingbostel. To Stannen kommen is de Landkreis in sien hüütigen Ümfang 1977 as de ollen Landkreisen Bremervöör un Rodenborg (Wümm), de bit to’n 15. Mai 1969 noch Rodenborg in Hannober (Afk.: Rodenborg (Hann.)) heten hett, tohopenleggt weern. Rodenborg harr bit dorhen dat Kfz-Kennteken ROH, Bremervöör harr dat Kennteken BRV.
Inholtsverteken |
[Ännern] Geologie
| Översicht Geoloogsch Tieten | ||
|---|---|---|
| Ära/Tietöller | Periood | Ma |
| Känozoikum Eerdneetiet |
Neogen | 23,03 |
| Paläogen | 65,5 | |
| Mesozoikum Eerdmiddelöller |
Kried | 145,5 |
| Jura | 199,6 | |
| Trias | 251,0 | |
| Paläozoikum Eerdfröhtiet |
Perm | 299,0 |
| Karbon | 359,2 | |
| Devon | 416,0 | |
| Silur | 443,7 | |
| Ordovizium | 488,3 | |
| Kambrium | 542,0 | |
| Präkambrium bargt all fröhere Tieten. |
||
Geoloogsch is Noorddüütschland vör ungefäähr 600-500 Miliionen Johren tostannen kamen in’t late Proterozoikum, wat to dat Präkambrium rekend warrt. De Landmass, de vundaag Noorddüütschland billt, leeg to de Tiet noch in deepe süüdlich Breden an’n Noordrand vun den Superkontinent Gondwana. De is later utenanner broken in en Tall vun lüttere un gröttere Lithosphärenplatten. En vun de lütteren Platten, de vun de Wetenschopplers Avalonia nöömt warrt, is na Noorden dreven, wo se in’n Silur vör ruch weg 450-420 Millionen Johren mit den ureuropääschen Kontinent Baltika tohopenstött is. De Kollision hett de Kaledonisch Bargenbilln na Oosten hen wieter maakt, de dorvör al in’n Noorden anfungen harr nu vör ungefäähr 410 Mio. Johren wedder ophöört hett. Wietere Mikroplatten hebbt sik in’t Karbon vör üm un bi 300 Mio. Johren vun Süden her anlagert un dorbi de Variskisch Bargenbilln veroorsaakt. De Resten dorvun billt vundaag de middeldüütschen Bargen.
De Landkreis Rodenborg (Wümm) liggt nöördlich vun de nordvarisk’schen Deformatschoonsfront op dat Lüünborg Massiv, dat to Avalonia höört un domit en Stück vun dat öllere Europa (Paläo-Europa) dorstellt. Dör dat Inwarken vun tektonische Kräft is Avalonia later afsackt un hett in’n Perm dormit Ruum geven för en wiet Meerrebeetm dat bit wiet na Middeleuropa vördrungen is. To disse Tiet sünd de Soltvörkamen (Zechsteen) billt worrn, de in’n ganzen Noordddüütschen Rumm to finnen sünd.
Dat Noorddüütsch Becken, as dat Rebeet bit to de Middelbargen ok nöömt warrt, hett sien geografsche Laag in de nafolgend Johren nich mehr ännert, is aver en poor mol anböhrt un wedder afsackt worrn. Vundaag is dat Noorddüütsch Becken mit düchtig veel fast worrn Sediment opfüllt, worut vörmols de Kaledoonsch Bargens bestahn hebbt, de denn aver dör Erosion afdragen worrn sünd. Vun de Bargens is hüüt nix mehr to sehn, man op disse Oort un Wies is de Noorddüütsch Becken bit to 10 km dick mit Sedimenten füllt.
[Ännern] Geografie
De Landkreis Rodenborg (Wümm) liggt op Geestland un hett in sien Süüdoosten Andeel an de Lünborger Heid un in’n Süüdwesten an dat Wümmsietland. De Noorden warrt de Kreis dör dat Düvelsmoor un dör dat Oostsietland bestimmt. De Hööch is teemlich gliekblievend.
[Ännern] Weertschap
De Kreis Rodenborg (Wümm) liggt in de Mitt vun de Intogsrebeden vun Hamborg, Bremen un Bremerhaven un höört to dat Metropolrebeet vun Hamborg – dit hett Bedüden in Hensicht op Weertschapshelp. In’n Kreis gifft dat tomeist verarbeidend Industrie (t. B. en Betonwark, Karosseriebo) aver ok en groten Deenstsektor. De ländlich Tourismus maakt sik ok ganz goot, so as Riedurlaub, Waterwannern oder Jagd in de westlichen Lünborger Heid oder in dat Wümmsietland.
[Ännern] Verkehr
[Ännern] Iesenbahnverkehr
De Historie vun de Iesenbahn in’n hüütigen Landkreis Rodenborg (Wümm) fangt 1873 an. Visselhövede weer de eerste Stadt, de mit de nieg open maakte Bahn Bremen-Uelzen en Ansluss kreegen hett.
Een Johr dorop neem denn de Hööftlien Hamborg-Bremen vun de Köln-Mindener Isenbahn-Sellschap ehrn Betrieb op. Rodenborg leeg ok op disse Streck, is aver eerst later to en Knotenpunkt worrn, as de Preuß’sch Staatsbahn 1906 en Verbinnen vun Visselhövede na Zeven schapt harr, de 1908 sogor bit Bremervöör wieter boot weer. As 1928 de Lien vun Rodenborg na Veern vun de Düütsche Rieksbahn dortokeem, harr de Preuß’sche Staatsbahn vun Visselhövede ut al de Nevenstreck na Walsroden open maakt.
De fröhere Kreisstadt Bremervöör weer 1898/99 – ok wedder dör de Preuß’sche Staatsbahn – toeerst mit Bremerhaven un Stood verbunnen worrn. Von disse Streck weer 1902 en Aftwiegen na Harsfeld bit Bookholt boot worrn un 1908 denn de Vebrinnen na Zeven. 1909 keem denn de Lüttbahn Bremervöör-Osterholt GmbH dorto.
In Zeven hett de Staatsbahn siet 1917 de Lüttbahn Wilst-Zeven-Töst GmbH krüüzt. Disse weer in Tarms al siet 1900 an de Smolspoorbahn na Bremen anslaten, de vun de Bremsch-Hannobersch Lüttbahn AG boot woorn is. Beid Bahnen legen toeerst trennt vuneenanner, bit 1927 in Tarms-Oost in direkten Övergang maakt weer. De Ünfang vun’t Iesenbahnnett werr dormit op 256 km anwussen.
Vun de optellten Bundsbahn- un Lüttiesenbahnstrecken sünd 1992 veele Deelen vun de Iesenbahnen un Verkehrsbedrieven Elv-Werser GmbH to een Nett tohopenfaat worrn, dat alleen in’n Kreis Rodenborg en Läng vun ungefäähr 163 km opwiest. Veele Personenstrecken weern bit dorhen aver al stillleegt. Nadem deelwies Lien wedder open maakt warrn sünd, gifft dat vundaag op 123 km Personenverkehr – 33 km dorvun höört to den „Moorexpress“.
[Ännern] Stratenverkehr
Dör den Landkreis Rodenborg (Wümm) verlööpt een Autobahn. Dat is de A 1, de Hamborg mit Bremen verbindt un dorbi dree Opfohrten op’n Kreisrebeet hett. Vun Noorden ut is dat toeerst Sittens, wo de Autobahn an de L 130 anslutt, de bi Hornborg in’n Landkreis Stood an de B 73 föhrt un in de annere Richt bi Scheeßl in de B 75 mündt. An de Opfohrt Boockel krüüzt de A 1 de B 71, de Zeven mit Rodenborg verbindt, un denn kummt noch de Opfohrt Stukenbossel, wo de B 75 verlöpt, de vun Bremen na Rodenborg föhrt.
Bito föhrt ok de Radfeernweg Hamborg-Bremen dör den Kreis, de över de Oortschoppen Sittens, Heessel un Zeven geiht.
[Ännern] Historie
Dat Kreisrebeet ümfaat historsch den Karn vun de Bisdömer un Kloosters Bremen un Veern. Na de Reformatschoon weern beid Kloosters to Hertogdömer ümwannelt, de toeerst däänsch un later denn sweedsch worrn sünd. De hüütig Landkreis Rodenborg (Wümm) is entstahn, as an’n 1. August 1977 de Ooltkreisen Rodenborg (Wümm) un Bremervöör tosammenslaten weern. De Ooltkreis Rodenborg hett fröher (bit 1969) Rodenborg in Hannober heten un de Ooltkreis Bremervöör weer 1932 dör Tohopenleggen vun de Kreisen Bremervöör un Zeven entstahn.
Na den Tweeten Weltkrieg hett de Ooltkreis Rodenborg de Paatschap för den Landkreis Angerborg in Oostpreußen övernahmen. Bremervöör harr de Paatschap för den Landkreis Stuhm in Westpreußen annahmen. Beid Paatschoppen sünd mit de Kommunalrefoorm op den hüütigen Landkreis Rodenborg (Wümm) överdragen worrn.
[Ännern] Religion
Dat Kreisrebeet is tomeist evangelsch-luthersch instellt. De Karkengemenen höört to de Landskark Hannober. Kathoolsche Gemenen, de to dat Bisdom Hilmessen tellt, hebbt sik sünners na den Krieg bildt tomeist dör de Towannerten vör allen ut Slesien un dat Ermland, aver ok vun Gastarbeiders ut Süüdeuropa oder Utsiedlers ut Oosteuropa. n de letzten Johren geev dat veele, de ut de Karken rutgahn sünd. Dorüm sünd de Karken dorbi, sik nieg to orden. T. B. weern de kathoolschen Karkengemenen vun Zeven un Rodenborg tohopenfaat to de „Seelsorgeenheit Rodenborg-Zeven“. In’n Kreis leevt aver ok veele Muslime, Liddmaten vun Freekarken un Tügen Jehovas
[Ännern] Kultur
Üm de kulturellen Inrichten vun’n Landkreis kümmert sik de Landschapsverband Stood, wat en indragen Vereen is.
[Ännern] Städer un Gemenen
(Inwahners an’n 30. Juni 2005)
Eenheitsgemenen
- Bremervöör, Stadt (19.169)
- Gnarrenborg (9.567)
- Rodenborg (Wümm), Stadt (22.111)
- Scheeßl (12.935)
- Visselhövede (hdt.), Stadt (10.659)
Samtgemenen mit jümmer Liddmatengemenen
Sitt vun de Samtgemeenverwalten *
- 1. Samtgemeen Bothel (hdt.) (8.734)
- Bothel (hdt.) * (2.460)
- Brockel (hdt.) (1.377)
- Heemsbünnen (1.238)
- Hemslingen (hdt.) (1.589)
- Kirchwalsede (hdt.) (1.295)
- Westerwalsede (hdt.) (775)
- 2. Samtgemeen Fintel (hdt.) (7.614)
- Fintel (hdt.) (2.961)
- Helsch (850)
- Lauenbrüch * (2.143)
- Stemmen (928)
- Vahlde (hdt.) (732)
|
|
|
