Patrick Stewart
From Wikipedia
Patrick Stewart (* 13. Juli 1940 in Mirfield, West Yorkshire, England) is en britischen Schauspeler. He hett meist 50 Johren lang Theater speelt. 25 Johren lang weer he Liddmaat vun de Royal Shakespeare Company.
Inholtsverteken |
[Ännern] Leven
Stewart weer as drütte Söhn vun den Soldaten Alfred Stewart un de Weverin Gladys Stewart. Mit twölf Johr al füng he an Theater to spelen. He is mit 16 Johr vun de School afgahn un hett dorna as Journalist arbeidt. Dör en Stipendium harr he de Möglichkeit, de Old Vic Theatre School bi Bristol to besöken, un mit 19 fünf he an, professionell an en Theater to spelen, wobi he jümmer grötteren Spood harr.
1966 heiraad he de Choreografin Sheila Falconer. Tohopen hebbt se twee Kinner, de 1968 un 1973 boren weern. De Eh hett blots bit 1990 hollen. Stewart hett sik denn vun sien Fro trennt un tein Johr later Wendy Neuss heiraad, de Produzentin bi düchtig veele Folgen vun de Fernsehserie Star Trek: The Next Generation weer. Siet eenige Tiet is he mit de britschen Schauspelerin Lisa Dillon verbandeln.
Opstunns is Stewart Kanzler vun de britsche Universität Huddersfield. Siet 2001 hett he den Titel vun en Officer of the Order of the British Empire. Patrick Stewart wohnt to Tiet in Stratford, England. Na egen Snacken müch he sik nu wedder mehr op dat Theater konzentreeren.
[Ännern] Wark
Patrick Stewart hett as Schauspeler in veele Filmen un Theateropföhren mitspeelt. Dör sien Rull as Kaptein Jean-Luc Picard in de Fernsehserie Star Trek: The Next Generation is he weltwiet bekannt warrn. He hett ok in mehr as 25 Kinofilmen mitspeelt. In Düütschland warrt he afwesselnd vun de Synchronsnackers Rolf Schult un Ernst Meincke synchroneseert. In Theaterkreisen weer Stewart ok vörher al beropen as en utermaten hogden Schauspeler mit en Vörleev för dat Wark vun William Shakespare – he hett jo ok lange Johren in de Royal Shakespeare Company speelt. In de Rull as Cpt. Picard hett he disse Anlaag ok inbringen künnt.
Siet 2000 wasst sien Publikum, siet he ok in de Verfilmen vun de X-Men-Reeg mitspeelt. Ofschonst Stewart lever veele ünnerscheedlich Typen spelen deit, is sien Rull bi de X-Men wedder en beten liek anleggt. En annere Parallele ist sien Optritt in de Verfilmen vun Moby Dick vun 1998, in den Stewart den Kapitän Ahab dorstellt. Mit Ahab weer aver ok Cpt. Picard in den Star Trek Kinofilm Star Trek: First Contact (dt.: Star Trek: Der Erste Kontakt) vergleken, as he Jagd op de Borg maken de.
Stewarts Theater-Insichten gaht in de Star Trek-Serie goot op, as he in sien Rull fakener mol mit ole Literatur uteneensett un faken ok dorut ziteert för sien Argumenteeren, wat Picard to en düchtig depsinnigen Charakter maakt. In de Fangemeen vun de Star Trek Welt gellt Picard as en vun de bedüdensten Figuren. Stewart weer dorför 1987 vun den Produzenten Robert Justman as de ideal Schauspeler utsocht worrn. Toeerst weer vörsehn, dat Stewart dorför en amerikaansch Akzent lehren schüll, man denn hett man sik doch entscheeden, em sien britschen Akzent to laten, wat in de Rull de europääsch Afkummst ünnerstrieken schüll.
Toletzt weer Patrick Stewart in X-Men: The Last Stand (dt.: X-Men: Der letzte Widerstand) in’n Kino to sehn. 2006 segg he in gegenöver dat britsch Daagblatt Daily Telegraph, dat he nich dorvun utgeiht, dat he noch mol in een Star Trek-Film mitspelen warrt, man he wull dat ok nich in’n Grundsatz utsluten. To iet konzentreert he sik wedder op dat Theaterspeel. In de letzten Johren weer he in verscheeden Rullen op de Bühn to sehn, so ok in’t Royal Shakespeare Theatre in Stratford-upon-Avon, wo he 2006 den Prospero in Shakespeares The Tempest speelt hett.
[Ännern] Filmrullen (Utwahl)
- 2006 – X-Men: The Last Stand (dt.: X-Men: Der letzte Widerstand)
- 2005 – Mysterious Island
- 2004 – The Lion in Winter (dt.: Der Löwe im Winter), Fernsehfilm
- 2003 – X2: X-Men United (dt.: X-Men 2)
- 2002 – Star Trek: Nemesis
- 2002 – King of Texas
- 2000 – X-Men
- 1999 – A Christmas Carol (dt.: A Christmas Carol – Die drei Weihnachtsgeister)
- 1998 – Moby Dick, Fernsehfilm in twee Dele
- 1998 – Star Trek: Insurrection (dt.: Star Trek: Der Aufstand)
- 1998 – Dad Savage
- 1998 – Safe House (dt.: Abgeschottet)
- 1997 – Conspiracy Theory (dt.: Fletchers Visionen)
- 1997 – Masterminds (dt.: Masterminds – Das Duel)
- 1996 – Star Trek: First Contact (dt.: Star Trek: Der erste Kontakt)
- 1995 – Jeffrey
- 1994 – Gunmen
- 1994 – Star Trek: Generations (dt.: Star Trek: Treffen der Generationen)
- 1994 – The Canterville Ghost (dt.: Das Gespenst von Canterville), Fernsehfilm
- 1993 – Death Train
- 1993 – Robin Hood:Men in tights (dt.: Robin Hood – Helden in Strumpfhosen)
- 1991 – L.A. Story
- 1987-94 – Star Trek: The Next Generation (dt.: Raumschiff Enterprise - Das nächste Jahrhundert), Fernsehserie
- 1986 – Lady Jane (dt.: Lady Jane – Königin für neun Tage)
- 1985 – Lifeforce (dt.: Lifeforce – Die tödliche Bedrohung)
- 1984 – Races
- 1984 – Dune (dt.: Der Wüstenplanet)
- 1981 – Excalibur
- 1980 – Little Lord Fauntleroy (dt.: Der kleine Lord)
- 1975 – Hennessy (dt.: Ein Mann namens Hennessy)
[Ännern] Utteken
Patrick Stewart is en beropen Schauspeler, de al faken för Priesen vörslahn weer. 1996 kreeg he den Will Award in Anerkennen för sien professionelle Theaterkarriere. Siet 1996 hett he ok sien Steern op’n Walk of Fame in Hollywood. För sien Dorstellen in Filmen weer Stewart 18 mol för Priesen nomineert, wunnen hett he dree dorvun:
- 1996: Den Family Film Award as Best Schauspeler in en Fernsehserie för The Canterville Ghost.
- 1998: Den Blockbuster Entertainment Award as Best Nevendorsteller in en spannenden Film för Conspiracy Theory.
- 2003: Den Bronze Wrangler vun de Western Heritage Awards för den Fernsehfilm King of Texas.
[Ännern] Websteed
- Patrick Stewart in de Internet Movie Database
