Reformeerte Kark
From Wikipedia
Dat lett so, as wenn disse Artikel nich so akraat is as de ween schull. Kiek ok op de Diskussionssiet vun den Artikel.
De reformeerte Kark is en tosammenfatend Utdruck för de protestansch Karken, de up dat Warken un Lehren van Johannes Calvin un Ulrich Zwingli in de Swiez torügg gahn. Daarum worden reformeerte Karken ok faken Calvinistisch Karken nömt.
De Calvinismus is en van de beid grote Utrichtens, de bi'd Reformatschoon rutkomen sünd. De anner bünd de Lutheraners. Dat gift en paar lüttje Unnerscheden in de Gloov. So hebben de Refoormeerten de Upfaten, dat dat hilig Abendmahl blot en symboolsche Hanneln is. Un dat gift de so nömt Prädestinatschoonslehr. De seggt ut, dat all Minschen vör dat Leven al vun Gott ten Hil oder Daud bestimmt sünd. Man dat is in de enkelde Karken maal mehr, maal minner en Saak van Belang.
In Dütschland gift dat de "Evangeelsch-reformeerte Kark – Synode van de reformeerte Karken in Bayern un Noordwest-Düütschland" un welke Freekarken, ten Bispeel de Altreformierte Kirche un de Bund evangelisch-reformierter Kirchen in der Bundesrepublik Deutschland. Mennig Lanneskarken in Düütschland hebben ok reformeerte un luthersche Gemeenten. De worden meest Unierte Karken nömt.
Wenn ok tüsken Luthersche un Reformeerte lüttje Unnerscheden bestahn, so hebben beid Karken en Karkengemeenskupp siet de Leuenberger Konkordie (Gemeenskupp van evangeelsche Karken in Europa). Wenn en Lutherscher Christ in en Oort wahnt, waar dat blot en refoormeerte Gemeente gift, denn hört he daarto. Un annersrum is dat nett so. So waard dat to'n Bispööl in Oostfreesland faken maakt, umdat daar in lüttje Dörpen meest blot en Kark, en luthersche of refomeerte, steiht.
In de Nedderlannen sünd de meesten protestansch Christen reformeert. Vördem sük dree protestansch Karken tosammensluten hebben, wassen de beid Gröttsten reformeerte Karken.
