Årstad
Frå Wikipedia – det frie oppslagsverket
Årstad er ein bydel i Bergen. Bydelen ligg sør for sentrum, og det bur om lag 33 300 menneske der. Bydelen med namnet Årstad har ikkje same grenser som det gamle Årstad prestegjeld, og t.d. er garden Årstad ikkje med i Årstad bydel.
Namnet «Årstad» kjem av «Alrekstad», som var namnet på kongsgarden som låg i området. Alrekstad har ei soge som er eldre enn Bergen by, med spor attende til ein Kong Alfred som skal ha budd der på 400-talet. Alrekstad vert nemnd fleire gonger i kongesogene.
Årstad sokn vart skilt ut frå Fana prestegjeld i 1752 og vart lagt til Hospitalskyrkja St. Jørgen i Bergen. I 1886 vart Årstad skilt ut frå St. Jørgen som eige prestegjeld. Seinare er fleire delar av Årstad frådelt som eigne prestegjeld: St. Markus i 1928, Fridalen og Solheim i 1957.
Det kom sterk industrivekst i Årstad i andre halvdel av 1800-talet. Bergen Mekaniske Verksteder og Wingaards Jernstøberi etablerte seg i Solheimsviken i 1850, og folketalet auka då raskt. I 1801 hadde Årstad sokn 290 innbyggarar, i 1900 budde det 4782 menneske i Årstad, og då kommunen vart innlemma i Bergen i 1915 var folketalet 10 774.
Årstad var eigen kommune fram til 1915, då han vart ein del av Bergen kommune.
