Lerum Fabrikker
Frå Wikipedia – det frie oppslagsverket
Lerum Fabikker eller Lerum Konserves er eit norsk familiekonsern som produserar hushaldingsprodukt. Det er delt inn i to selskap: Lerum Fabrikker AS og Lerum Konserves AS. Konsernet rår over tre fabrikkar på Kaupanger, i Sogndal og i Lærdal. Mest kjend er verksemda for å produsere saft, som var det første Lerum produserte for sal. Lerum er den største produsenten av ekte saft i Noreg.
Lerum starta opp som ein liten landhandel, driven av Kari og Nils H. Lerum i Luster. Den her landhandelen har i dag vorte gjort om til eit industri- og handelsmuseum. Fabrikkane har hatt stor innflytnad på lokalsamfunna der dei har vorte etablert. Supportarlaget til Sogndal Fotball kallar seg Saftkokaradn (Saftkokarane), noko som viser at Lerum sin saftfabrikk er ein viktig hjørnestein i lokalsamfunnet.
Rettferdig handel: Lerum Fabrikker produserar den norske Max Havelaar-appelsinjuicen.
[endre] Historie
Verksemda vart først starta opp i 1905 som ein liten landhandel i kjellaren til Kari og Nils H. Lerum i Luster. Her vart dei eit mellomstopp for bær som den lokale folkesetnaden skulle sende til Bergen.
I 1909 bygde dei eit lite hus i den veglause bygda Sørheim for å presse bær til saft for sal. I følgje soga fekk dei idéen allereie i 1907, då nokre stampar med bær ikkje hadde fått plass på båten, og Kari Lerum hadde funne det for godt å presse saft av dei. I 1919 vart produksjonen utvida og flytta frå Sørheim til Sogndal, der det var stor råvaretilgang frå dei mange lokale bøndene.
I 1982 kjøpte Lerum ein fabrikk på Hermansverk frå det konkursråka Bergens & Drægni Produkter AS (tidlegare Drægni AS). Her vart det laga syltetøy, og seinare brus og juice, fram til produksjonen vart nedlagt i 1990-åra, då konsernet bygde opp eit nytt anlegg på Kaupanger og utvida fabrikken i Sogndal.
