Tsjeljabinsk
Frå Wikipedia – det frie oppslagsverket
Tsjeljabinsk, russisk Челябинск, er ein by i Russland og hovudstad i Tsjeljabinsk oblast. Folketalet er 1 093 000 (2006) innanfor bygrensene og 1 330 000 innanfor det urbane området.
Tsjeljabinsk ligg på austsida av Uralfjella, om lag 200 meter over havet. Byen ligg 210 km sør for Jekaterinburg, ved elva Miass. Byen er eit viktig transportknutepunkt. Mellom anna går den transsibirske jernbanen gjennom byen. Flyplassen heiter Balandino. Byen er eit senter for metallurgi, maskinindustri og lett industri.
Byen vart grunnlagd i 1736. Han var ein småby fram til 1892, då den transsibirske jernbanen vart lagt gjennom byen. Etter dette vaks folketalet raskt, og byen vart eit transportknutepunkt og handelssentrum. Vidare vekst kom i samband med den andre verdskrigen då mykje ny industri vart bygd i byen, i tillegg til at industri og offentlege institusjonar frå dei vestlege delane av Sovjetunionen vart evakuert til byen.
