Néo-Gothique
From Wikipedia
|
Ch't' articl'ye fut c'menchie en Jèrriais
 |
Lé style Néo-Gothique, ou l'Gothique ravigoté, 'tait eune manniéthe dé design, d'architectuthe et d'art tchi fut lanchie au dgiêx-huitchième siècl'ye quand d's architectes et d's antitchaithes quémenchîtent à êtudier et apprécier l'art du Mouoyen Âge.
Dans la littéthatuthe, les histouaithes du Rouai Èrthu înspithîtent d's idées romantiques dé danmes et dé c'valièrs. Un întéthêt dans les ruinnes et l'pittoresque êmoûtchait d's aristocrates à bâti des p'tits châtchieaux et des chapelles et hèrmitages dans lus grands gardîns et bouaîs'sies. En Jèrri, lé Sieur Dauvèrgne, tch'avait sans doute veue la maîson Gothique à Horace Walpole, Strawberry Hill à Londres, bâtit la Tou du Prînce à La Hougue Bie.
En France, au c'menchement du dgiêx-neuvième siècl'ye la mode des gardîns à l'Angliaîche apportit d'ches folies, mais l'histouaithe à Victor Hugo Notre Danme dé Paris înspithîtent des gens, et dans l'rouoyaume dé chu temps-là nou-s'appouaintit un commissaithe, Prosper Mérimée, tchi fit des travaux sus l'èrgraiethie des vièrs bâtisses et monuments. L'architecte Eugène Viollet-le-Duc travaillait dans la manniéthe Néo-Gothique.
En Angliétèrre, l'Églyise d'Angliétèrre avait à bâti des nouvieaux templ'yes pouor les gens des nouvelles villes îndustrielles. Souos l'înfluence des cheins coumme John Ruskin tch'avaient ardgumenté qu'la manniéthe Gothique 'tait eune manniéthe Chrêtchienne tchi mouontrait la fouai des bâtisseurs dans la pièrre et la stchulptuthe, bein d'ches églyises fûtent êrigies dans eune manniéthe dé même. Augustus Welby Northmore Pugin 'tait un grand nom.
Quand l'Bâtisse du Parlément à Londres brûlit en 1834, Messire Charles Barry et Pugin pliannîtent un bâtisse Néo-Gothique pouor lé rempliaichi. Ch'est iun des bâtisses Néo-Gothiques les pus fanmeurs du monde.
[amendaer] Gal'lie
[amendaer] Jèrri
 À Saint Hélyi, eune banque (1873) |
 L'églyise dé Saint Thonmas, Saint Hélyi |
 Chapelle Wesleyenne, St. Martîn (1850) |
